AĞCABƏDİDƏ YARIMSTANSİYANIN TİKİNTİSİNƏ DAİR MÜQAVİLƏ İMZALANMIŞDIR
“Azərenerji” açıq tipli səhmdar cəmiyyətinin yeni qurumu “Azərenerjixüsusitəmirtikinti” ilə “SİMENS” şirkəti arasında Ağcabədidə 330/110 kilovat gərginlikli yarımstansiyanın tikilməsinə dair saziş imzalanmışdır.
“Azərenerji”nin mətbuat xidmətindən AZƏRTAC-ın müxbirinə bildirmişlər ki, yarımstansiya ”Mingəçevir enerji sisteminin yenidən qurulması” layihəsi çərçivəsində tikiləcəkdir. Sazişin şərtlərinə əsasən, bütün tikinti-quraşdırma işlərini “Azərenerjixüsusitəmirtikinti” həyata kecirəcək, “SİMENS” isə yarımstansiyanı müasir avadanlıqla təmin edəcəkdir. Fevralda başlanacaq tikinti işləri 5 aya qurtarmalıdır.
Yarımstansiyanın istifadəyə verilməsi bütövlükdə ölkənin enerji şəbəkəsini gücləndirməyə imkan yaradacaq və respublikanın mərkəzi, qərb və şimal rayonlarına elektrik enerjisinin fasiləsiz ötürülməsini təmin edəcəkdir.
Həyata keçirilmiş struktur dəyişiklikləri nəticəsində “Azərenerji”nin çoxsaylı tikinti və təmir idarələrinin bazasında ixtisaslaşdırılmış 2 iri qurum - “Azərenerjixüsusitəmirtikirti” və “Azərenerjixüsusitəmirsazlama” yaradılmışdır. Hazırda bunlara yüksək ixtisaslı kadrlar cəlb edilir.
Bölmənin digər xəbərləri
