Ağdərənin Talış kəndində oftalmoloji səyyar müayinələr keçirilib VİDEO
Ağdərə, 30 aprel, Tahir Ağaməmmədov, AZƏRTAC
Səhiyyə Nazirliyi işğaldan azad olunan ərazilərdə Böyük Qayıdış Proqramı çərçivəsində vətəndaşlar arasında müxtəlif tibbi müayinələr, eyni zamanda, sağlamlığın təşviqi istiqamətində maarifləndirici aksiyaların keçirilməsini davam etdirir.
AZƏRTAC-ın bölgə müxbiri xəbər verir ki, aprelin 30-da Səhiyyə Nazirliyinin akademik Zərifə Əliyeva adına Milli Oftalmologiya Mərkəzinin Səyyar Klinikası tərəfindən Ağdərə rayonunun Talış kəndində əhali üçün oftalmoloji müayinələr aparılıb. Məqsəd vətəndaşların operativ şəkildə müayinəsi, görmə qabiliyyətinin zəifləməsinin qarşısının alınması, görmə patologiyasının erkən diaqnostikasının aşkarlanması və müalicələrin təyin olunmasıdır.
Oftalmoloq Elçin Əsgərov bildirib ki, səyyar klinikada ən müasir oftalmoloji aparatlar mövcuddur və bunun sayəsində pasiyentlərə dəqiq diaqnoz qoyulur. Müayinələr əsasında vətəndaşlarda quru göz sindromu, allergik konyunktivit, refraksiya patologiyası, miopik astiqmatizm və digər xəstəliklər aşkarlanıb.
Aksiya zamanı, həmçinin göz xəstəlikləri ilə bağlı ümumi monitorinqlər aparılıb və əldə edilən nəticələr müzakirə olunub. Ciddi problemlərlə üzləşən və çətin əməliyyat tələb olunan pasiyentlərin akademik Zərifə Əliyeva adına Milli Oftalmologiya Mərkəzinə gəlmələrinə şərait yaradılıb.
Ümumilikdə, oftalmoloji aksiya çərçivəsində 70-ə yaxın vətəndaş müayinədən keçib.
Qeyd edək ki, Səhiyyə Nazirliyi tərəfindən işğaldan azad olunan digər ərazilərdə də davamlı olaraq tibbi müayinələrin və maarifləndirici tədbirlərin keçirilməsi nəzərdə tutulub.
Bölmənin digər xəbərləri
