Aleksandr Sırski: Rusiya ötən il Odessaya daxil olmağı planlaşdırırdı
Kiyev, 13 yanvar, AZƏRTAC
Ötən il Ukrayna üçün ciddi sınaq ili olub, çünki Rusiya müharibəni öz şərtləri ilə, yəni hərbi məğlubiyyət yolu ilə başa çatdırmağa cəhd göstərib.
AZƏRTAC xəbər verir ki, bunu Ukrayna Silahlı Qüvvələrinin baş komandanı Aleksandr Sırski bildirib.
O deyib ki, qarşı tərəf Donetsk, Luqansk və Zaporojye vilayətlərinin qalan ərazilərini, Xerson vilayətinin sağ sahilini ələ keçirməyə cəhd edib, həmçinin Ukraynanı Qara dənizdən tam şəkildə ayırmaq məqsədilə Odessaya çıxmağı planlaşdırıb.
“Biz düşmənin kritik irəliləyişlərinə yol vermədik, onun planlarını pozduq və planlaşdırılmış əməliyyatların icra müddətlərini dəfələrlə təxirə salmağa məcbur etdik”, – deyə Aleksandr Sırski diqqətə çatdırıb.
Baş komandan vurğulayıb ki, ukraynalı hərbçilər imkanlarının son həddində fəaliyyət göstərərək Rusiya ordusunu maksimum itkilər verməyə məcbur ediblər. İl ərzində qarşı tərəfin qüvvələrinin sayı öldürülənlər və yaralananlar hesabına 418 mindən çox azaldılıb.
“Bu il sübut etdi ki, biz düşməni sistemli şəkildə tükəndirməyə və onun potensialını nəzərəçarpacaq dərəcədə azaltmağa qadirik. Müdafiə qüvvələri təcavüzkara planlarını həyata keçirməyə imkan verməyib, strateji mövqeləri qoruyub və gələcək hərbi fəaliyyətlər üçün əsas yaradıb”, – deyə o bildirib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
