Bakı, 27 dekabr (AZƏRTAC). Dekabrın 27-də Bakı Biznes Mərkəzində Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsinin Gənclər Şurası tərəfindən 31 Dekabr - Dünya Azərbaycanlılarının Həmrəylik Günü və Yeni il münasibəti ilə ali məktəb tələbələri üçün bayram tədbiri keçirilmişdir.

AZƏRTAC xəbər verir ki, Azərbaycan Həmkarlar İttifaqları Konfederasiyasının və ATİAHİ Respublika Komitəsinin sədri, Milli Məclisin deputatı Səttar Mehbalıyev 31 Dekabr - Dünya Azərbaycanlılarının Həmrəylik Günü və Yeni il münasibəti ilə gəncləri təbrik etmişdir.

Ölkəmizdə həyata keçirilən gənclər siyasətindən danışan S.Mehbalıyev bildirmişdir ki, ümummilli lider Heydər Əliyev həmişə gənclərə diqqət və qayğı ilə yanaşmışdır. Hələ sovet dövründə ulu öndər Azərbaycan gənclərini Rusiyanın aparıcı universitetlərində təhsil almağa göndərirdi. Həmin kadrlar bu gün də ölkəmizin inkişafına töhfə verirlər. Hazırda bu siyasət Azərbaycan Prezidenti İlham Əliyev tərəfindən uğurla davam etdirilir. S.Mehbalıyev Prezident İlham Əliyevin Sərəncamı ilə təsdiqlənmiş “Azərbaycan gəncliyi 2011-2015-ci illərdə” Dövlət Proqramı”nda gənclərin inkişafı, onların təhsil alması, işlə təmin olunması və sağlam böyüməsi üçün bütün məsələlərin yer aldığını vurğulamışdır.

Nəzərə çatdırılmışdır ki, ATİAHİ Respublika Komitəsi gənclər siyasətinin fəal iştirakçısıdır. Təşkilat tərəfindən hər il bu istiqamətdə çoxsaylı tədbirlər həyata keçirilir. Gənclərin hüquq və mənafelərinin müdafiəsi, onların həmkarlar ittifaqı üzvlüyünə cəlb edilməsi, işəgötürənlər tərəfindən gənclərin hüquqlarının qorunması, onların sağlam ruhda böyüməsi ATİAHİ Respublika Komitəsinin gənclərlə bağlı fəaliyyətinin əsasını təşkil edir. Hər il spartakiadalar, müsabiqələr, idmanın müxtəlif növləri üzrə yarışlar, intellektual oyunlar təşkil edilir, sosial durumu ağır olan tələbələr üçün pulsuz naharlar təşkil edilir, ehtiyacı olan ittifaq üzvlərinə maddi yardımlar verilir. Bundan başqa, tələbələrdə elmə, təhsilə marağın artırılması məqsədilə 1995-ci ildə ATİAHİ Respublika Komitəsinin adlı təqaüdü təsis edilmişdir. İndiyədək ali təhsil müəssisələrində qış və yay sessiyasının nəticələrinə görə uğur əldə etmiş yüzlərlə tələbə bu təqaüddən yararlanmışdır. Belə tədbirlərin təşkilində başlıca məqsəd gənclərin asudə vaxtının səmərəli keçirilməsi, onlarda elmə, təhsilə maraq yaratmaqdır.

Mərasimdə, həmçinin 2012-ci ildə idman və musiqi sahələrində beynəlxalq yarışlarda yüksək nailiyyətlər göstərmiş tələbə gənclərə ATİAHİ Respublika Komitəsinin fəxri fərmanları və pul mükafatları verilmişdir.

Sonra Azərbaycan Təhsil İşçiləri Azad Həmkarlar İttifaqı Gənclər Şurasının sədri İrfan İsgəndərov çıxış edərək ölkədə gənclərə göstərilən diqqət və qayğıdan, həyata keçirilən tədbirlərdən, rəhbərlik etdiyi qurumun fəaliyyətindən danışmışdır.

Tədbir ziyafət və konsert proqramı ilə davam etmişdir.