Zaur Ramazanov: “Zirə” yalnız bəxt hesabına “Qarabağ”a qalib gələ bilər
Bakı, 1 iyun, AZƏRTAC
“Final bir oyundan ibarət olduğu üçün proqnoz vermək hər zaman çətin olur”.
Bu sözləri AZƏRTAC-a açıqlamasında veteran futbolçu Zaur Ramazanov Azərbaycan Kubokunun finalında keçiriləcək “Qarabağ” – “Zirə” oyunu barədə danışarkən deyib.
O bildirib ki, matçın nəticəsi “Qarabağ”ın finala hansı tərzdə hazırlaşmasından asılı olacaq: “Qurban Qurbanovun komandası meydana çempion kimi çıxacaq. Mövsümü titulla bitirdikləri üçün Ağdam təmsilçisinin hansı əhvali-ruhiyyə ilə meydana çıxması önəmlidir. “Qarabağ” matçın favoriti sayılır. Lakin final olduğuna görə şansları əlli-əlliyə hesab edirəm”.
Onun sözlərinə görə, “Zirə” bəxt hesabına kuboku qazana bilər: “Düşünürəm ki, “qartallar” üçün çətin görüş olacaq. Ancaq hər şey hakimin final fitindən sonra məlum olacaq”.
Qeyd edək ki, iyunun 2-də “Liv Bona Dea Arena”da reallaşacaq final qarşılaşması saat 20:00-da başlayacaq.
Bölmənin digər xəbərləri
