ALİ VƏ ORTA İXTİSAS TƏHSİLİ MÜƏSSİSƏLƏRİ MƏZUNLARININ BURAXILIŞ GECƏSİ KEÇİRİLMİŞDİR

30.06.2006 [23:27]
Çap et
A⁺ A^-

AZƏRTAC xəbər verir ki, iyunun 30-da Şəhriyar adına Bakı Mədəniyyət Mərkəzində respublikamızın ayrı-ayrı ali və orta ixtisas təhsili müəssisələri məzunlarının təntənəli buraxılış gecəsi keçirilmişdir.

Tədbirdə tanınmış təhsil işçiləri, ictimaiyyətin nümayəndələri də iştirak etmişlər.

Gənclər və idman naziri Azad Rəhimov və təhsil nazirinin müavini Elmar Qasımov çıxış edərək, ölkəmizdə gənclərə, təhsilə göstərilən dövlət qayğısından danışmışlar.

Təhsilin cəmiyyətin inkişafında mühüm rolu olduğunu qeyd edən natiqlər, gənclərimizin beynəlxalq fənn olimpiadalarında yüksək nəticələr qazandıqlarını da qürur hissi ilə diqqətə çatdırmışlar. Onlar məzunları təbrik edərək, xoş arzularını bildirmişlər.

Təhsildə yüksək nəticələr əldə etmiş məzunlara Gənclər və İdman Nazirliyinin diplomları və hədiyyələri təqdim olunmuşdur.

Gecə incəsənət ustalarının maraqlı konsert proqramı ilə başa çatmışdır.