Almaniya Kansleri: Avropa Ukraynaya dəstəyini davam etdirməlidir
Bakı, 6 fevral, AZƏRTAC
Avropa Ukraynanı dəstəkləməyə davam etməlidir.
AZƏRTAC xəbər verir ki, bunu Almaniya Kansleri Olaf Şolz mətbuat konfransında deyib.
“Rusiya iki ilə yaxındır ki, Ukraynaya qarşı barışmaz müharibə aparır və bu münaqişənin sonu görünmür”, - deyə Olaf Şolz bildirib.
O, Avropanın Ukraynaya dəstəyini davam etdirməli olduğunu vurğulayıb: “Avropa Şurasının yaxın bir neçə il ərzində Ukraynaya büdcə dəstəyi üçün vəsaiti təsdiqləməsi yaxşı əlamətdir. Həmçinin yaxşı haldır ki, Avropa Ukraynaya dəstəyini necə artıra biləcəyi haqqında düşünməyə başlayıb”.
Xatırladıb ki, bu il Almaniya Kiyevə silah təchizatı üçün 7 milyard avrodan çox vəsait ayıracaq.
Kanslerin sözlərinə görə, Ukraynaya yardım lazım olduğu müddət davam edəcək. “Ümid edirəm ki, ABŞ Konqresi tezliklə lazımi maliyyə dəstəyi verməyə qərar verəcək”, - deyə Olaf Şolz əlavə edib.
Qeyd edək ki, Almaniya Kansleri fevralın 8-də ABŞ-a səfəri çərçivəsində Prezident Co Baydenlə görüşəcək. Tərəflərin Ukraynaya dəstəyi davam etdirmək niyyətlərini təsdiqləyəcəkləri gözlənilir.
Bölmənin digər xəbərləri
