ALMANİYA YƏHUDİLƏRİ NASİST HEYKƏLLƏRİNİ DÜNYA ÇEMPİONATININ QURĞULARINDAN GÖTÜRMƏYİ TƏLƏB EDİRLƏR

01.06.2006 [22:30]
Çap et
A⁺ A^-

AZƏRTAC xəbər verir ki, Almaniyada yaşayan yəhudi fəalları Hitler rejimi dövründə yaradılan və hazırda Berlindəki “Olimpiya” stadionunu bəzəyən heykəllərin oradan götürülməsini, yaxud heç olmasa, onların üstünə pərdə çəkilməsini tələb edirlər. Onlar bundan ehtiyatlanırlar ki, dünya çempionatına gələcək futbol azarkeşləri heykəlləri nasizmin təbliği kimi başa düşəcəklər.

Holokost qurbanlarına Berlinin mərkəzində abidə qoyulması uğrunda kampaniyanın təşəbbüskarı olan xanım Ley Roşu vaxtilə Arno Breker tərəfindən yaradılmış heykəllər xüsusilə həyəcanlandırır. Bir vaxtlar Avropanın ən yaxşı arxitektorlarından sayılan Breker “Olimpiya” stadionunu “Onnövçü” və “Qalib qız” kimi məşhur heykəllərlə bəzəmişdir. Bundan başqa, “yəhudilərin qara siyahısı”na Karl Albikerin və Georq Kolbenin də idmançılar təsvir olunmuş heykəlləri düşmüşdür.

Lakin alman tarixçilər abidələrin məhv edilməsi ideyasına şübhə ilə yanaşırlar. Kristof Ştoltsl ümumi rəyi belə ifadə etmişdir: “XX əsr sənətinin xeyli hissəsi diktatorlarla bu və ya digər dərəcədə bağlıdır. İnsan bədəninin təsviri ilə irqçilik arasında əlaqə olduğu barədə fikir əsassızdır”.

“Olimpiya” stadionu 2006-cı il dünya futbol çempionatının Almaniyanın faşist keçmişi ilə bağlı olan yeganə qurğusu deyildir. Nürnberq stadionu ötən əsrin 30-cu illərində nasist yürüşlərinin keçirildiyi parkın yaxınlığında yerləşir.

Xatırladaq ki, müasir Almaniyada Hitler rəmzinin daşınması qanun pozuntusu hesab edilir.