ALMANİYANIN KEÇMİŞ DÖVLƏT KATİBİ OTTO HAUZERİN ÇIXIŞI
- Cənab Prezident!
Hörmətli qurultay iştirakçıları!
Mən qurultay iştirakçılarına Almaniya hökumətinin salamlarını çatdırmaq istərdim. Mən buraya tərcüməçi kimi Berlində doktoranturada oxuyan bir gənci gətirmişəm. Bu qonaqpərvərlikdir və biz bununla Almaniya ilə Azərbaycan arasındakı münasibətləri daha da genişləndirə bilərik. Almaniyada minlərlə azərbaycanlı yaşayır və biz onlarla birgə yaşamaqdan qürur duyuruq və onları öz qonağımız kimi saxlayırıq.
Mən sizə həmçinin Baden-Vürtemberq federal əyalətinin rəhbərinin salamlarını çatdırmaq istərdim. Baden-Vürtemberq əyalətinin paytaxtı Ştutqart şəhəridir. Kim Ştutqart şəhərini tanımırsa, bilsin ki, söhbət “Mersedes” avtomobillərinin istehsal olunduğu şəhərdən gedir.
Bizim əlaqələrimizin tarixi kökləri qədimlərə gedib çıxır. XIX əsrin əvvəllərində Baden-Vürtemberq əyalətindən yüzlərlə alman köçüb Azərbaycana gəlmişdir. Bu tarixi əlaqələr əsasında biz sizə təkcə “Mersedes” avtomobillərini verməklə kifayətlənmək istəmirik, başqa sahələrdə, xüsusilə mədəniyyət sahəsində birgə əməkdaşlıq etmək istəyirik. Bunun üçün mən Baden-Vürtemberq əyalətinin rəhbərinin məktubunu cənab Prezidentə şəxsən təqdim etmək istərdim. Mən burada olmağımdan xüsusi şərəf duyuram, dəvətə görə təşəkkür edirəm. Bakıda olduğum müddətdə özümü çox məmnun hiss etdim. Sizə təşəkkür edirəm.
X X X
Sonra qurultayın Mandat Komissiyasının sədri, Milli Məclis sədrinin birinci müavini Ziyafət Əsgərovun hesabatı dinlənildi.
Almaniyadakı Maynts-Azərbaycan Cəmiyyətinin sədri Başar Kömür, Fransadakı “Azərbaycan Evi” Assosiasiyasının sədri Səid İsmailoff, Ukrayna Azərbaycanlıları Konqresinin sədri Oqtay Əfəndiyev, Türkiyə Böyük Millət Məclisinin deputatı Yücel Artantaş, Ümumrusiya Azərbaycan Konqresinin prezidenti Məmmədbağır Əliyev, avstriyalı professor, türk tarixinin tədqiqatçısı Erix Fayql, Avropa Azərbaycanlıları Konqresinin prezidenti Bahəddin Qaya, Amerikadakı Azərbaycan Cəmiyyətinin prezidenti Tomris Azəri, Dünya Azərbaycanlıları Konqresinin sədri Cavad Derəxti, Litva Prezidentinin müşaviri Halina Kobeskayte, Estoniya parlamentinin deputatı Eldar Əfəndiyev, Latviyanın cəmiyyətin inteqrasiyası məsələlərində xüsusi tapşırıqlar üzrə naziri Aynars Latkovskis, ABŞ-dakı Azərbaycan Yəhudiləri Cəmiyyətinin sədri Yakov Abramov, İsveçdəki “Qarabağ” Dərnəyinin sədri Abdulla Əmir Haşimi, Belarus Azərbaycan İcmaları Konqresinin sədri Natiq Bağırov çıxış etdilər.
Qurultayın Redaksiya Komissiyasının sədri, Prezidentin İcra Aparatının İctimai-siyasi məsələlər şöbəsinin müdiri Əli Həsənov Dünya azərbaycanlılarının II qurultayının qətnaməsini oxudu.
Dünya azərbaycanlılarının II qurultayı nümayəndələrinin Azərbaycan Respublikasının Prezidenti İlham Əliyevə müraciəti, Dünya azərbaycanlılarının II qurultayı nümayəndələrinin bütün dünya azərbaycanlılarına müraciəti, Ermənistan-Azərbaycan, Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin parlamentlərinə, dövlət və hökumət başçılarına müraciəti, BMT-nin Təhsil, Elm və Mədəniyyət Məsələləri Təşkilatına (YUNESKO) müraciəti, Azərbaycan və türk diaspor təşkilatlarına müraciəti qəbul olundu.
Sonra təşkilati məsələlərə baxıldı. Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev Təşkilat Komitəsinin təkliflərini nümayəndələrin diqqətinə çatdırdı.
Azərbaycan Respublikasının Prezidenti İlham Əliyev yekdilliklə Dünya Azərbaycanlılarını Əlaqələndirmə Şurasının sədri seçildi.
AMEA-nın prezidenti Mahmud Kərimov Dünya Azərbaycanlılarını Əlaqələndirmə Şurası İdarə heyətinin sədri seçildi. Əlaqələndirmə Şurasının say tərkibi müəyyən edildi.
Bununla da qurultay öz işini başa çatdırdı.
Bölmənin digər xəbərləri
