Almaniyanın silah istehsalçıları ziyan çəkirlər
Berlin, 25 fevral, AZƏRTAC
Almaniyanın ən iri silah istehsalçısı - “Rheinmetall” konserni, onun ardınca gələn “ThyssenKrupp” və “Krauss-Maffei Wegmann” şirkətləri Almaniya istehsalı olan silahların satış həcminin dalbadal üç il azaldığını bəyan ediblər.
AZƏRTAC xəbər verir ki, Almaniyanın silah istehsalçıları silah satışının pik həddə çatdığı 2015-ci ildə 7 milyard 860 milyon avroluq məhsul satıblar, lakin satış həcmi 2018-ci il üçün azalaraq 4 milyard 620 milyon avroya bərabər olub.
Almaniyadan ən çox Əlcəzair, ABŞ, Avstraliya və Səudiyyə Ərəbistanı silah alırlar. Lakin jurnalist Camal Kaşıkçının qətlindən sonra, Səudiyyə Ərəbistanı ordusunun Yəməndə hərbi əməliyyatları fonunda AFR hökuməti Ər-Riyada silah satışını dayandırmağı qərara alıb. Almaniya Müdafiə Sənayesi Assosiasiyası hökumətin Krallığa silah satışına qadağa qoymaq qərarını tənqid edərək, onu siyasi xarakterli qərar adlandırıb, istehsalçıların müqavilələri siyasi qərarlara görə pozulanda, onların çəkdiyi ziyanın hökumət tərəfindən ödənilməsini tələb edib.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
