ALMATIDA MEDİA FORUM BAŞA ÇATMIŞDIR
Media Forumda Xəzər və Asiya mövzusunda keçirilən sessiyada Azərbaycan xarici işlər nazirinin müavini Xələf Xələfov, ABŞ-dakı Nikson Mərkəzinin proqram direktoru Zeyno Baran, Qazaxıstan xarici işlər nazirinin birinci müavini Kayrat Abuseitov iştirak etmişlər.
Sessiyada Mərkəzi Asiya və Qafqaz ölkələrində iqtisadiyyat və biznesin inkişafı, Xəzərin zəngin təbii sərvətlərinin işlənilməsi, ekologiya problemlərinə toxunulmuş və bu məsələlərin kütləvi informasiya vasitələrində işıqlandırılması diqqət mərkəzində olmuşdur.
Xələf Xələfov Xəzərin hüquq statusunun həlli məsələsindən danışaraq demişdir ki, üç Xəzəryanı dövlət - Qazaxıstan, Azərbaycan və Rusiya bununla bağlı sazişlər imzalamışdır və bu məsələdə bizim mövqelərimiz üst–üstə düşür. Dialoq davam etdirilir və mən əminəm ki, qarşıda duran problemləri həll edə biləcəyik.
Sonra o, Xəzərin enerji ehtiyatlarının dünya bazarına çıxarılmasından, bu məsələlərdə Azərbaycanın mövqeyindən bəhs etmişdir.
Forumun təşkilat komitəsinin sədri Dariqa Nazarbayeva tədbirə yekun vurmuş, müzakirə edilən məsələlərin həyata keçirilməsində iştirakçılara uğurlar arzulamışdır.
