AMEA-da dəyirmi masa: “Elm və gender mədəniyyəti”
Bakı, 24 noyabr, AZƏRTAC
Noyabrın 24-də AMEA-da Ümummilli Lider Heydər Əliyevin və akademik Zərifə Əliyevanın 100 illik yubileylərinə həsr olunmuş “Elm və gender mədəniyyəti” mövzusunda dəyirmi masa keçirilib.
Bu barədə AZƏRTAC-a AMEA-dan məlumat verilib. Bildirilib ki, AMEA Rəyasət Heyəti və Qadınlar Şurasının birgə təşkilatçılığı ilə keçirilən tədbirdə Dövlət Himni səsləndirilib, Ulu Öndərə və akademik Zərifə Əliyevaya həsr olunmuş videoçarx nümayiş etdirilib.
AMEA-nın vitse-prezidenti akademik İradə Hüseynova 2023-cü ilin Azərbaycanda “Heydər Əliyev İli” elan olunması, eləcə də Prezident İlham Əliyevin “Akademik Zərifə Əliyevanın 100 illik yubileyinin qeyd edilməsi haqqında” Sərəncamından irəli gələrək ölkəmizin bütün müəssisələrində Ulu Öndərin və görkəmli elm xadimi Zərifə Əliyevanın yubileylərinin geniş şəkildə qeyd olunduğunu diqqətə çatdırıb.
Zəngin elmi irsi ilə Azərbaycan oftalmologiyasına mühüm töhfələr vermiş Zərifə Əliyevanın Azərbaycan xalqı qarşısındakı xidmətlərindən danışan İ.Hüseynova bildirib ki, görkəmli alimin oftalmologiyanın müxtəlif sahələri üzrə apardığı tədqiqatlar, əldə etdiyi nailiyyətlər və bunların əsasında yaratdığı fundamental əsərlər Azərbaycan tibb elminin parlaq səhifələridir. Diqqətə çatdırılıb ki, akademik Zərifə Əliyeva ölkəmizdə milli oftalmologiyanın əsasını qoyub, göz xəstəlikləri ilə bağlı bir çox yeni elmi ideyaların müəllifi kimi bütün dünyada tanınıb. Oftalmologiya sahəsində elmi məktəb yaratmış görkəmli alimin birbaşa rəhbərliyi ilə gənc mütəxəssislər və həkim-oftalmoloqlar nəsli yetişib. Akademik Zərifə Əliyeva tərəfindən aparılmış, effektivliyi əsaslı tədqiqatlarla həm nəzəri, həm də praktiki şəkildə sübut olunmuş müalicə metodu traxomanın sosial xəstəlik kimi ləğv edilməsində mühüm rol oynayıb. Görkəmli alimin bu istiqamətdə elmi kəşfi bütün SSRİ respublikaları üçün ümid işığı olub və oftalmologiya elmi qarşısında əvəzsiz xidmət hesab olunub.
Akademik İradə Hüseynova 1979-cu ildə Azərbaycan SSR Elmlər Akademiyasının Fiziologiya İnstitutunda məhz Zərifə xanımın təşəbbüsü və təşkilatçılığı ilə yaradılmış laboratoriyada az intensivli zəhərli istehsal sahələrində görmə orqanına fizioloji, klinik, funksional, histoloji mexanizmlərin təsirinin öyrənilməsi üzrə olduqca əhəmiyyətli tədqiqatların aparıldığını diqqətə çatdırıb. Bildirib ki, alimin apardığı elmi tədqiqatlar, onun ictimai fəallığı, pedaqoji istedadı dünya elmi ictimaiyyəti tərəfindən layiqincə qiymətləndirilib və Zərifə xanım çoxsaylı mükafatlara layiq görülüb.
O, qadınlara təhsil və digər hüquqların verilməsi, onların elm, təhsil və mədəniyyətdə geniş şəkildə təmsil olunmasının Ulu Öndərin adı ilə bağlı olduğunu deyib, Zərifə xanım Əliyevanın bu istiqamətdə tədbirlərin görülməsində Ümummilli Liderə daim dəstək olduğunu vurğulayıb. İradə Hüseynova qeyd edib ki, ölkə Prezidenti də çıxışlarında Azərbaycanın bugünkü simasının formalaşmasında qadınların əvəzsiz rolu olduğunu vurğulayıb. O, qadın alim və tədqiqatçılarımızın AMEA-nın həyatında mühüm əhəmiyyət kəsb etdiyini söyləyib.
AMEA-nın vitse-prezidenti vəzifəsini icra edən akademik Gövhər Baxşəliyeva ölkəmizdə qadınların rolunun artırılmasına, onların inkişafına və hüquqlarının qorunmasına hər zaman böyük diqqət göstərildiyini vurğulayıb. Ulu Öndərin qadınların cəmiyyətin müxtəlif sahələrində fəal iştirakının təmin edilməsinə xüsusi önəm verdiyini xatırladan alim dahi liderin siyasi hakimiyyətə gəlişi ilə qadınların hər sahədə, o cümlədən akademiyanın ictimai və mədəni həyatında fəal təmsil olunduqlarını diqqətə çatdırıb.
G.Baxşəliyeva bu siyasətin ölkə Prezidenti İlham Əliyev tərəfindən uğurla davam etdirildiyini, ölkə başçısının dövlət qadın siyasətinin daha böyük nailiyyətlərlə icrasını təmin etdiyini vurğulayıb. O, Azərbaycanın qadınların kişilərlə bərabər rəhbər vəzifələrdə təmsil olunması məsələlərinə dair dövlət səviyyəsində qərarların qəbul olunduğu dövlətlərdən biri olduğunu bildirib. O, Ümummilli Liderin sədaqətli dostu və etibarlı silahdaşı olan Zərifə xanımın elm üçün gözəl tədqiqatçı, övladlarına qayğıkeş ana, sadə vətəndaş olduğunu qeyd edib, onun şərəfli ömür yolunun hər bir Azərbaycan vətəndaşı, hər bir alim və həkim üçün həyat və mənəviyyat dərsi, müdriklik məktəbi olduğunu bildirib.
AMEA Qadınlar Şurasının sədri Rəna Mirzəzadə Azərbaycanda qadın hüquqlarının qorunması, təbliğ olunması, qadınların dövlət siyasətinin həyata keçirilməsində və qanunların qəbul edilməsində iştirakının artırılması dövlət siyasətinin ayrılmaz tərkib hissəsi olduğunu bildirib. Ulu Öndərin qadınların idarəetmə, qərar qəbuletmə və sosial həyatın bütün sahələrində irəli çəkilməsini vacib amil kimi irəli sürdüyünü diqqətə çatdırıb.
Tədbirdə “Azərbaycan tarixində görkəmli qadınlar”, “Heydər Əliyev və Azərbaycan elmi”, “Heydər Əliyev və Zərifə Əliyeva şəxsiyyətləri xatirələrdə”, “Elmdə alim qadın yaddaşı”, “Akademik Zərifə Əliyeva: zərif varlıq elmin inkişafında güclü qüvvədir”, “Elm, təhsil və innovasiya gənc qızlar üçün gələcəyə açılan geniş qapılardır”, və digər mövzularda məruzələr dinlənilib.
Bölmənin digər xəbərləri
