AMEA İNFORMASİYA TEXNOLOGİYALARI İNSTİTUTU ŞƏBƏKƏ AKADEMİYASI KİMİ TANINMIŞDIR

01.10.2005 [22:56]
Çap et
A⁺ A^-

AZƏRTAC xəbər verir ki, Azərbaycan Milli Elmlər Akademiyasının İnformasiya Texnologiyaları İnstitutu şəbəkə texnologiyaları üzrə dünyada lider sayılan “Cisco Systems” şirkəti tərəfindən şəbəkə akademiyası kimi tanınmış və ona müvafiq sertifikat verilmişdir. Bu sənədə əsasən, institutun Tədris Mərkəzinə müraciət edənlərə “İT Essentials-I” və “İT Essentials-II” xüsusi proqramları tədris olunacaq, imtahan vermiş şəxslərə “Cisco Systems” adından dünyanın bütün ölkələrində tanınan müvafiq sertifikatlar təqdim olunacaqdır.

İnstitutun müasir texnologiyalarla, ən yeni kitablar və əyani vasitələrlə təchiz olunmuş Tədris Mərkəzində respublikamızın bütün ali təhsil və elmi tədqiqat mərkəzlərinin aspirant və dissertantlarına, dövlət qurumlarının əməkdaşlarına, vətəndaşlara, gənc nəslin nümayəndələrinə xüsusi proqramlar üzrə “İnformatika” kursları tədris olunur, onlara kompüter və İnternet ilə praktiki işləmək vərdişləri aşılanır.

NATO-nun “Virtual İpək Yolu” layihəsinin “İctimai İnternet Mərkəzi” statusunu almış Tədris Mərkəzi, eyni zamanda informasiya texnologiyaları sahəsində dünya standartları sırasına daxil olan ECDL (European Computer Draving Licence) üzrə sertifikatlar vermək hüququna da malikdir.

AMEA İNFORMASİYA TEXNOLOGİYALARI İNSTİTUTU ŞƏBƏKƏ AKADEMİYASI KİMİ TANINMIŞDIR

MÜƏLLİFLƏ ƏLAQƏ