Anar Bağırov: Vəkilliyə ən savadlı hüquqşünaslar qəbul olunmalıdır
Bakı, 17 iyul, AZƏRTAC
Cəmi bir neçə il əvvələ qədər Azərbaycanda 11 min nəfərə bir vəkil düşürdüsə, artıq təqribən 3300 nəfərə bir vəkil düşür. Bu da əslində yaxşı bir dinamikadır. Getdikcə ölkəmizdə adambaşına düşən vəkillərin sayı artır.
AZƏRTAC xəbər verir ki, bunu Vəkillər Kollegiyasının sədri Anar Bağırov jurnalistlərə açıqlamasında deyib.
"Biz bəzi ölkələrdəki kimi vəkilliyə qəbulun imtahansız olmasının tərəfdarı deyilik. Yəni vəkilliyə ən savadlı hüquqşünaslar qəbul olunmalıdır. Çünki vəkilin bilik səviyyəsi hakimdən, prokurordan, müstəntiqdən aşağı olmamalıdır. Vəkil vətəndaşın güvənc yeridir. Onun hüquqi problemləri olanda o, vəkilə inanır və müraciət edir. Vəkil də keyfiyyətli hüquqi yardım göstərməkdən ötrü yüksək bilik səviyyəsinə malik olmalıdır. Ona görə bizdə mürəkkəb imtahan sistemi var. İmtahanlarımız çox obyektiv, şəffaf şəkildə keçirilir. Nəticədə ən bilikli hüquqşünaslar vəkil statusu əldə etməlidirlər ki, gələcəkdə məhkəmə qərarlarında və digər prosessual sənədlərdə müəyyən boşluqları, səhvləri tapa, onların aradan qaldırılması ilə bağlı şikayətlər hazırlaya bilsinlər və nəticə etibarilə vətəndaşlara keyfiyyətli hüquqi yardım göstərsinlər. Yəni bu fəaliyyət səmərəli olmalıdır. Səmərəli fəaliyyət isə xüsusi bilik səviyyəsi tələb edir", - deyə A.Bağırov bildirib.
Bölmənin digər xəbərləri
