SİYASƏT
Andorrada “Avropada etimadın bərpa olunması” mövzusunda beynəlxalq konfrans işə başlayıb
Konfrans Diasporla İş üzrə Dövlət Komitəsinin və Andorra hökumətinin dəstəyi ilə Nizami Gəncəvi Beynəlxalq Mərkəzi və Madrid Klubu tərəfindən təşkil olunub.
Diasporla İş üzrə Dövlət Komitəsindən AZƏRTAC-a bildirilib ki, beynəlxalq toplantının əsas məqsədi 2015-ci ildə Bakıda keçiriləcək III Qlobal Müştərək Cəmiyyətlər Forumuna hazırlıq məsələlərini müzakirə etməkdir. Konfransın işində Nizami Gəncəvi Beynəlxalq Mərkəzinin həmsədrləri - Latviyanın sabiq Prezidenti Vayra Vike-Freyberqa, İsgəndəriyyə Kitabxanasının direktoru İsmail Seragəldin, eləcə də sabiq prezidentlər Viktor Yuşşenko (Ukrayna), Recep Meydani (Albaniya), Stefan Mesiç (Xorvatiya), Emil Konstantinesku (Rumıniya), Boris Tadiç (Serbiya), Petar Stoyanov (Bolqarıstan) iştirak edirlər. Bundan başqa, Diasporla İş üzrə Dövlət Komitəsinin sədri Nazim İbrahimov, Andorranın sabiq Baş naziri Oskar Ribas, Azərbaycanın İspaniyadakı səfiri Altay Əfəndiyev də toplantıya qatılıblar.
Konfransda çıxış edən V.V.Freyberqa, İ.Serageldin, N.İbrahimov, O.Ribas hazırda dünyada cərəyan edən proseslərə toxunaraq mövcud olan qlobal və regional problemlərin həllində birgə səy göstərilməsinin vacibliyini vurğulayıblar. Bildirilib ki, bu gün dünyada baş verən hadisələr BMT-yə üzv ölkələrin ümidlərini heç də doğrultmur və dünya xalqları çətin vəziyyətdə yaşayırlar.
Konfransda regionda təhlükəsizlik məsələləri, dondurulmuş münaqişələr, o cümlədən Dağlıq Qarabağ, Abxaziya, Osetiya problemlərinin, Ukrayna böhranının müzakirəsinə də xüsusi diqqət ayrılıb. Çıxış edənlər bildiriblər ki, dünya böhran içindədir və bu gün Avropada müharibə təhlükəsi baş qaldırıb. Yaranmış mürəkkəb vəziyyətdən çıxış yolları tapmaq üçün yeni ideyalar və birgə səylər tələb olunur.
Konfrans iştirakçıları qlobal problemlər haqqında geniş fikir mübadiləsinin aparıldığı toplantının bu problemlərin həlli istiqamətində dərin və əhatəli addımların atılmasına öz töhfəsini verəcəyinə ümid etdiklərini deyiblər.
Toplantıda 2015-ci ildə Bakıda keçiriləcək III Qlobal Müştərək Cəmiyyətlər Forumuna hazırlıq məsələlərinin müzakirəsinə də geniş yer ayrılıb. İştirakçılar Forumun əhəmiyyətini xüsusi vurğulayaraq tədbirin dünyada sülhün və təhlükəsizliyin bərqərar olunmasına, mədəniyyətlərarası dialoq, dözümlülük, tolerantlıq və beynəlxalq aləmi narahat edən bir çox məsələlərin həllində uğur əldə edilməsinə böyük töhfələr verə biləcəyini qeyd ediblər.
İki gün davam edəcək konfransda III Qlobal Müştərək Cəmiyyətlər Forumunun gündəliyinin, müzakirə olunacaq məsələlərin və iştirakçıların müəyyənləşdirilməsi nəzərdə tutulub.