Anım tədbirində Azərbaycan xalqına qarşı törədilən qəddarlıqlardan danışılmışdır
Bakı, 18 yanvar (AZƏRTAC). Yanvarın 18-də Bakı Slavyan Universiteti (BSU) YAP gənclər birliyinin təşkilatçılığı ilə 20 Yanvar faciəsinin ildönümünə həsr olunmuş anım mərasimi keçirilmişdir.
BSU-nun mətbuat xidmətindən AZƏRTAC-a bildirmişlər ki, tədbirdə Vətənimizin azadlığı yolunda canlarından keçmiş şəhidlərin əziz xatirəsi bir dəqiqəlik sükutla yad edilmişdir.
Tədbirdə çıxış edən universitetin tərbiyə işlər üzrə prorektoru, dosent Oqtay Səmədov bildirmişdir ki, 20 Yanvar Azərbaycan xalqının tarixinə qanla yazılmış səhifələrdən biridir. O müdhiş gecə tariximizə təkcə faciə kimi yox, həm də Azərbaycan xalqının mübarizlik, qəhrəmanlıq günü kimi daxil olmuşdur. Xalqımız 20 Yanvarda hərbi, siyasi və mənəvi təcavüzə məruz qalsa da, öz tarixi qəhrəmanlıq ənənələrinə sadiq olduğunu, Vətənin azadlığı və müstəqilliyi naminə ən ağır sınaqlara sinə gərmək, hətta şəhid vermək əzmini həmin gecə bütün dünyaya nümayiş etdirdi.
Dosent C.Beydullayev 1990-cı il yanvarın 19-dan 20-nə keçən gecə sovet ordusunun Azərbaycan xalqına qarşı törətdiyi vəhşilik və qəddarlıqlardan danışmışdır. Qeyd etmişdir ki, Azərbaycanın müstəqilliyi uğrunda canlarını fəda etmiş şəhidlərin xatirəsi xalqımızın ümummilli lideri Heydər Əliyev tərəfindən daim əziz tutulmuş, qanlı hadisələrə hüquqi-siyasi qiymət verilmişdir.
Tədbirin sonunda 20 Yanvar hadisələrinə həsr olunmuş film nümayiş olunmuşdur.
Bölmənin digər xəbərləri
