Anonim ianə Rembrandtın əsərini İsveçdə saxlamağa kömək edib
Stokholm, 28 noyabr, Nərgiz Cəfərli, AZƏRTAC
Anonim ianə sayəsində Rembrandtın unikal “Yuli Sivilisin sui-qəsdi” tablosu qarşıdakı 7,5 il ərzində İsveç Milli Muzeyində qalacaq.
AZƏRTAC xəbər verir ki, İsveçin Kral Rəssamlıq Akademiyası öz iclasında bununla bağlı yekdilliklə qərar qəbul edib.
Kral Rəssamlıq Akademiyasının mətbuat üçün açıqlamasında deyilir: “Razılaşma ianə sayəsində mümkün olub və donor bu vasitə ilə İsveçin mədəni həyatının iki mühüm müəssisəsini dəstəkləmək istəyir. Onların hər ikisi öz missiyalarının dəstəklənməsi və inkişafı üçün maliyyə vəsaiti qoyulmasına möhtacdır”.
Yayılan məlumata əsasən, bu incəsənət əsərinə görə icarə haqqı ildə 38 300 dollar təşkil edir.
“Yuli Sivilisin sui-qəsdi” tablosu 1864-cü ildən bəri İsveçdədir və onu tez-tez bu ölkənin muzey aləminin əsl xəzinələrindən biri hesab edirlər.
Sözügedən əsər Amsterdamda yenicə tikilən şəhər zalı üçün sifariş edilib və 1662-ci ildə orada asılıb. Amma sifarişçilər azad respublikanın rəmzi kimi nəzərdə tutulan tablodan narazı qalıb və məşhur əsər düzəlişlər etmək üçün Rembrandta geri qaytarılıb.
Rəsm əsəri 1734-cü ildə Amsterdamda hərraca çıxarılıb, daha sonralar isə İsveçə gətirilib.
Bölmənin digər xəbərləri
