Antonio Koşta: Avropa İttifaqında ümumi müdafiə üçün ortaq maliyyələşdirmə olmalıdır
Afina, 15 sentyabr, AZƏRTAC
Avropa Şurasının sədri Antonio Koşta Yunanıstanın Baş naziri Kiriakos Mitsotakislə görüşündən sonra bəyan edib ki, Avropa İttifaqı (Aİ) üzv ölkələr üçün müdafiə kreditləri ayırsa da, ümumi müdafiə üçün ortaq maliyyənin təmin edilməsi vacibdir. AZƏRTAC xəbər verir ki, bu barədə Yunanıstanın milli xəbər agentliyi məlumat yayıb.
A.Koşta qeyd edib ki, Aİ üzvlərinə müdafiə məqsədləri üçün 150 milyard avroluq kredit proqramı mövcuddur, lakin daha geniş imkanların yaradılması tələb olunur. Müdafiə xərclərinin əhəmiyyətli dərəcədə artırılmalı olduğunu söyləyən Aİ Şurasının sədri əlavə edib ki, bu prioritetlərdən biri müdafiə sənayesi və hərbi şirkətlərin inkişafı olmalıdır. O vurğulayıb ki, dörd il öncə Avropada ortaq müdafiədən danışan olmayıb, lakin Ukraynada münaqişənin başlanmasından sonra Aİ Ukraynanı siyasi, iqtisadi və hərbi baxımdan dəstəkləyir. Koşta bildirib ki, müdafiə ümumi olmalıdırsa, maliyyələşmə də ümumi olmalıdır. O əlavə edib ki, Aİ-nin təhlükəsizlik məsələlərində əsas diqqəti şərqi sərhədlərə yönəlir, lakin Kiprdən Finlandiyaya, Portuqaliyadan Rumıniyaya qədər digər sərhədlərin də müdafiəsi unutulmamalıdır. Qeyri-qanuni miqrasiya və qaçaqmalçılıqla mübarizə məqsədilə sərhəd idarəçiliyi təkmilləşdirilməli, həmçinin vahid Avropa miqrasiya siyasəti hazırlanmalıdır.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
