A.PAŞAZADƏ: MƏN HEÇ BİR VƏCHLƏ DOĞMA AZƏRBAYCANIMIZA XƏLƏL GƏTİRƏ BİLƏCƏK HƏRƏKƏTƏ YOL VERMƏMİŞƏM
Müraciətdə deyilir: “Mənim məlum karikaturalara birmənalı münasibət bildirməyim də məhz belə arzuolunmaz hadisə və gedişatların qarşısının mümkün qədər alınması, xoşagəlməz olayların önlənməsi məramına xidmət edirdi. Mən öz mövqeyimi bildirdim və bir daha onu təsdiqləyirəm... Bir daha bəyan edirəm ki, mənim mövqeyimi, ilk növbədə, ümummilli maraqların diktə etdiyi məntiq şərtləndirir”.
Bütün mənalı həyatını Vətənə, millətə, dövlətçiliyimizə və dinimizə ləyaqətlə xidmət işinə həsr etdiyini xatırladan Şeyxülislam bildirir ki, mən heç bir vəchlə doğma Azərbaycanımıza xələl gətirə biləcək hərəkət və ya ifadəyə yol verməmişəm və inşallah bundan sonra da vermərəm. Fürsətdən istifadə edərək, üzümü bütün həmvətənlərimə tutur, onları sayıqlıq nümayiş etdirməyə, düşünülməmiş addımlardan çəkinməyə, düşmən xizlətlilərin niyyətlərinə rəvac verməməyə çağırıram.
Azərbaycan jurnalistikasının həmişə sağlam ənənələrdən qaynaqlandığını, nəcib dəyərlərə, zəngin təcrübəyə malik olduğunu vurğulayan bütün Qafqazın şeyxi müraciətini bu fikirlərlə bitirir: “Mən əminəm ki, belə bir böyük məktəb keçmiş Azərbaycan mətbuatı ənənələrə sadiq qalaraq, öz yüksək mənəvi borcunu bundan sonra da lazımi səviyyədə həyata keçirəcək, böhtan yazanlara, qara yaxanlara layiqli cavab vermək iqtidarı nümayiş etdirəcəkdir”.
