AQTA yanında İctimai Şuraya növbəti seçkilər keçirilib
Bakı, 12 aprel, AZƏRTAC
Aprelin 12-də Azərbaycan Qida Təhlükəsizliyi Agentliyi (AQTA) yanında İctimai Şuranın üzvlərini müəyyənləşdirmək məqsədilə səsvermə keçirilib.
AZƏRTAC xəbər verir ki, seçki komissiyasının qərarına əsasən bu il fevralın 3-ü tarixli elan əsasında İctimai Şuraya üzvlüklə əlaqədar müraciət edən hər bir vətəndaş cəmiyyəti institutunun nümayəndəsi namizəd kimi qeydə alınıb. Səsvermə prosesində 52 vətəndaş cəmiyyəti institutunun nümayəndəsi iştirak edib.
Səsvermə prosesinin mövcud qanunvericiliyin tələblərinə əsasən təşkilini, eyni zamanda tam şəffaf və ədalətli keçirilməsini təmin etmək məqsədilə, bütün lazımi sənədləri özündə ehtiva edən məlumat lövhələri, səsvermə qutusu və digər lazımi avadanlıqlarla təmin edilmiş seçki otağı hazırlanıb. Bununla yanaşı, seçici sayını nəzərə alaraq, seçki komissiyasının qərarına əsasən 56 nüsxə seçki bülleteni hazırlanaraq çap edilib.
Seçki prosesinin sonunda səsvermə qutusu açılıb və Seçki Komissiyasının üzvlərinin iştirakı, müşahidəçilərin nəzarəti altında səslər hesablanıb. Namizədliyi irəli sürülmüş 12 nəfərdən ən çox səs alan 9 nəfəri AQTA yanında İctimai Şuranın üzvü seçilib.
Səsvermənin nəticələrinə görə, “Report” İnformasiya Agentliyinin baş redaktorunun müavini Abbasov Pərvin Əkbər oğlu, “Azərbaycan Gübrə İstehsalçıları və İdxalatçıları Assosiasiyası” İctimai Birliyinin sədri Abdullayev Əbdülhüseyn Məmməd oğlu, "Azərbaycan Süd və Süd Məhsulları İstehsalçıları və İxracatçıları Assosiasiyası”nın İdarə Heyətinin sədri Eyyubov Samir Kürdoğlu oğlu, Azərbaycan Milli QHT Forumunun (MQF) Beynəlxalq Əlaqələr Mərkəzinin rəhbəri Məmmədov Amin Fəramiz oğlu, “Azərbaycan Nar İstehsalçıları və İxracatçıları Assosiasiyası” İctimai Birliyinin sədri Qaraşov Fərhad Arif oğlu, “Azərbaycan Meyvə-Tərəvəz İstehsalçıları və İxracatçıları Assosiasiyası”nın İdarə Heyətinin sədri Quliyev Bəşir Şain oğlu, “Azərbaycan Heyvandarlıq Assosiasiyası” İctimai Birliyinin İdarə Heyətinin sədri Səfərov Nazim Faiq oğlu, "Qidalanma və Sağlamlıq" İctimai Birliyinin sədri Şamilov İlqar Şahvələd oğlu və Qadın və Uşaqların İnnovativ Maarifləndirilməsinə Dəstək İctimai birliyinin sədri Zülfüqarlı Aytac Sədrəddin qızı İctimai Şuranın üzvü seçiliblər.
AQTA yanında İctimai Şura qida təhlükəsizliyi sahəsi üzrə qanunvericilik bazasının təkmilləşdirilməsinə, ümumdövlət və yerli səviyyədə qərarların qəbuluna, institusional inkişafın və ölkədə qida təhlükəsizliyinin təmin edilməsinə əhəmiyyətli töhfə verəcək. Eyni zamanda, qida təhlükəsizliyi sahəsində hazırlanacaq qanunvericilik aktları, qaydalar, texniki normativ hüquqi aktlar və digər metodiki göstərişlər ictimai rəy nəzərə alınmaqla, sahibkarların, istehlakçıların və vətəndaş cəmiyyəti üzvlərinin iştirakı təmin olunmaqla təkmilləşdiriləcək.
Qeyd edək ki, İctimai Şura mərkəzi icra hakimiyyəti orqanlarının fəaliyyətində şəffaflığı, ictimai nəzarətin həyata keçirilməsi, dövlət siyasətinin formalaşdırılması, icrası və qərarların qəbulu zamanı ictimai rəyin nəzərə alınmasını təmin etmək məqsədilə “İctimai iştirakçılıq haqqında” Qanuna uyğun olaraq təsis edilən və ictimai əsaslarla fəaliyyət göstərən birlikdir.
Bölmənin digər xəbərləri
