Bakı, 27 sentyabr, AZƏRTAC

“Tottenhem”in gücü hamıya məlumdur. Hər kəs bilir ki, bu komandanın oynadığı çempionatın sürəti və dinamikası Azərbaycan Premyer Liqasından qat-qat üstündür”.

Bu sözləri AZƏRTAC-a açıqlamasında Azərbaycan millisinin sabiq futbolçusu və məşqçisi Arif Əsədov “Qarabağ”ın UEFA Avropa Liqasının əsas mərhələsinin ilk turunda İngiltərədə “Tottenhem”ə 0:3 hesabı ilə məğlub olduğu görüş barədə danışarkən deyib.

54 yaşlı mütəxəssis rəqibin qələbəsini futbolçuların ustalıq səviyyəsi və komandanın avrokubok təcrübəsi ilə əlaqələndirib: “Qarşılaşmanı analiz edəndə “Qarabağ”ın görüşün ilk dəqiqələrində öz oyununu diktə edə bildiyini görürük. Hətta bir çox qol epizodlarının yaradılmasına baxmayaraq, bundan istifadə edə bilmədilər. Belə matçlarda ələ düşən minimum imkandan maksimum yararlanmaq lazımdır. Düzdür, londonlular matçın 80 dəqiqəsini azlıqda oynadılar. Amma qol vura bilməyəndən sonra xal götürmək, əlbəttə ki, çətindir. Futbolçularımızın fərdi səhvləri də oldu. Təəssüf ki, Toral Bayramov penalti zərbəsini dəqiq yerinə yetirə bilmədi. “Tottenhem” kimi güclü komandalar kiçik səhvləri belə bağışlamır. Eyni mənzərəyə UEFA Çempionlar Liqasının pley-off mərhələsində Xorvatiyanın “Dinamo” klubu ilə oyunda da şahid olduq. Komandamız ev və səfər qarşılaşmalarının heç birində rəqibin qapısına yol tapa bilmədi. Zaqreb təmsilçisi isə əlinə düşən fürsətlərdən istifadə etdi”.

A.Əsədov “Qarabağ”ın Liqa mərhələsinin II turunda Bakıda İsveçin “Malmö” komandasına qarşı keçirəcəyi görüşə də toxunub: “Londondakı oyun onu göstərdi ki, Ağdam klubunun istənilən rəqibə müqavimət göstərmək potensialı var. “Qarabağ” hiss etdi ki, bu tip komandalara qarşı da oynamaq olar. İnanıram ki, Qurban Qurbanovun komandası növbəti matçlarda rəqibi üstələyib xallar qazana bilər. Uduzsaq belə, bu matç gələcəyə optimist baxmağımız üçün şərait yaradır. “Malmö” ilə evdəki görüşdə komandamızdan qələbə gözləyirəm. Ümid edək ki, “Qarabağ” buraxılan səhvlərdən nəticə çıxarıb isveçlilərə qarşı doğma meydanda yaxşı oyun nümayiş etdirəcək”.

Qeyd edək ki, Ağdam təmsilçisi oktyabrın 3-də Bakıda İsveçin “Malmö” klubu ilə üz-üzə gələcək. Tofiq Bəhramov adına Respublika Stadionunda keçiriləcək görüş saat 20:45-də start götürəcək.