ARKADİ NAYDİÇ “PREZİDENT KUBOKU” İKİNCİ BEYNƏLXALQ ŞAHMAT FESTİVALININ AÇIQ TURNİRİNİN QALİBİ OLMUŞDUR
AZƏRTAC xəbər verir ki, almaniyalı beynəlxalq qrossmeyster Arkadi Naydiç Bakı Əyləncə Mərkəzində keçirilən ümummilli lider Heydər Əliyevin xatirəsinə həsr olunmuş “Prezident kuboku” ikinci beynəlxlaq şahmat festivalında açıq turnirin qalibi olmuşdur. Doqquzuncu turda yarışda ən yüksək reytinqə malik ingilis Naycel Şorta qalib gələn almaniyalı qrossmeyster turnirin baş mükafatı - fəxri kubok və 5000 ABŞ dollarına sahib çıxmışdır. İsveçrəli Vadim Milovla heç-heçə oynayan belçikalı Vadim Malaxatko ikinci, Qədir Hüseynov üzərində qələbə qazanmış hollandiyalı Lyuk Van Veyli isə üçüncü yeri tutmuşdur.
Azərbaycan şahmatçıları arasında Nicat Məmmədov, Qədir Hüseynov və Rauf Məmmədov ilk onluqda yer almışlar.
Açıq turnirdə fərqlənmiş bütün şahmatçılar festivalın təşkilatçıları tərəfindən müxtəlif qiymətli hədiyyələrlə mükafatlandırılmışlar.
Festivala mayın 12-də keçiriləcək blits (sürətli) turnirlə yekun vurulacaqdır.
Bölmənin digər xəbərləri
