Arvana kurqanının artefaktları Tarix Muzeyinin arxeoloji kolleksiyasına təhvil verilib
Bakı, 6 may, AZƏRTAC
Hər il arxeoloqlarımızın fədakar əməyi nəticəsində Azərbaycanın qədim tarixini və zəngin mədəniyyətini əks etdirən neçə-neçə abidə, o cümlədən maddi mədəniyyət nümunəsi aşkar edilir. Sevindirici haldır ki, arxeoloqlarımız öz ənənələrinə sadiq qalaraq gərgin araşdırmalardan sonra tapdıqları maddi nümunələrin elmi və bədii baxımdan əhəmiyyətli hissələrini Milli Azərbaycan Tarixi Muzeyinə təhvil verirlər. Bu günlərdə muzeyin Arxeologiya fonduna daimi mühafizə üçün təhvil verilmiş maddi nümunələr arasında Arvana kurqanının artefaktları da yer alır.
Bu barədə AZƏRTAC-a muzeydən məlumat verilib. Bildirilib ki, həmin artefaktlar AMEA Arxeologiya və Etnoqrafiya İnstitutunun “Yardımlı arxeoloji ekspedisiyası”nın rəisi, tarix üzrə fəlsəfə doktoru, dosent Anar Ağalarzadənin rəhbərliyi altında 2019-cu ildə Yardımlı rayonu ərazisindəki Tunc-İlk Dəmir dövrü abidələrində, daha dəqiq desək, rayonun Arvana kəndi ərazisində qeydə alınmış kurqanda apardığı arxeoloji tədqiqat işləri zamanı tapılıb. Arvana kurqanı eyniadlı kənddən 200 metr cənubda, el arasında “Qaryatan” adlanan yerdədir.
Muzeyə təhvil verilmiş Arvana kurqanının artefaktları müxtəlif formalı 8 ədəd saxsı qabdan, tunc rapiraşəkilli qılıncdan, tunc xəncərdən, pasta və sümük muncuqlardan ibarətdir. Müqayisəli təhlillərə əsasən bu tapıntılar e.ə. I minilliyin əvvəllərinə aid edilir. Mütəxəssislər bu tapıntıların elmi əhəmiyyətini nəzərə alaraq onların tunc dövrü ekspozisiyasında nümayiş etdirilməsini məqsədəuyğun hesab ediblər.
Bölmənin digər xəbərləri
