ASTANADA AVRASİYA MƏKANININ SABİT İNKİŞAF PERSPEKTİVLƏRİNƏ HƏSR OLUNMUŞ FORUM KEÇİRİLMİŞDİR
AZƏRTAC-ın xüsusi müxbiri xəbər verir ki, Astanada Avrasiya məkanının sabit inkişaf perspektivlərinə həsr olunmuş Forum keçirilmişdir.
Tədbirdə Avropa, Asiya və MDB ölkələrinin ekologiya nazirləri, beynəlxalq təşkilatların nümayəndələri iştirak etmişlər.
Azərbaycanı bu forumda ekologiya və təbii sərvətlər naziri Hüseynqulu Bağırov təmsil etmişdir.
Qazaxıstanın ətraf mühitin mühafizəsi naziri Nurlan İskakov iştirakçıları salamlamış, Baş nazir Kərim Məsimovun məktubu oxunmuşdur.
Nurlan İskakov bildirmişdir ki, Astana şəhərində Avrasiya Su Mərkəzi yaradılır. Böyük elmi tədqiqat mərkəzi kimi fəaliyyətə başlayacaq bu qurum su mənbələrinin ekoloji problemlərini kompleks şəkildə həll edəcəkdir.
Forumda yeraltı su hövzələrinin qorunması və təmizlənməsi, torpaq sahələrindən səmərəli istifadə olunması, Xəzərin çirkləndirilməsi məsələləri, suyun insanın həyatında mühüm əhəmiyyəti mövzularında məruzələr dinlənilmiş, Astanada BMT-nin sabit inkişafı üzrə istitutunun yaradılması məsələləri müzakirə edilmişdir.
Hüseynqulu Bağırov öz çıxışında əhalinin içməli su ilə təmin edilməsi sahəsində Azərbaycanda həyata keçirilən layihələr, Xəzər dənizinə axıdılan çirkli suların qarşısının alınması sahəsində ölkəmizdə görülən işlər haqqında məlumat vermişdir. Onun sözlərinə görə, Abşeron yarımadasının 61 kilometrlik ərazisində müasir təmizləyici qurğular quraşdırılmışdır ki, bu da dənizi çirklənmədən qoruyur.
Forumda təklif olunmuşdur ki, türkdilli dövlətlərin ekologiya nazirlərinin qurumu yaradılsın və bu təşkilatın ilk iclası Bakıda keçirilsin.
Bölmənin digər xəbərləri
