ASTARADA BU İL ALİ MƏKTƏBLƏRƏ QƏBUL OLUNAN GƏNCLƏRLƏ GÖRÜŞ KEÇİRİLMİŞDİR
AZƏRTAC xəbər verir ki, Astara Rayon İcra Hakimiyyətində bu il ali məktəblərə qəbul olunan gənclərlə görüş keçirilmişdir.
Tələbə adını qazanmış gənclər əvvəlcə Heydər Əliyev parkında ümummilli liderin abidəsinin önünə gül dəstələri düzmüşlər.
İcra hakimiyyətinin başçısı Mahir Quliyev görüşdə çıxış edərək ölkəmizdə təhsilin inkişafına göstərilən dövlət qayğısından danışmış, tələbə adını qazanmaqla yanaşı, həm də oktyabrın 15-də keçiriləcək prezident seçkilərində ilk dəfə səs verəcək gəncləri təbrik etmişdir.
Bu il rayon məktəblərinin məzunlarından 141 nəfəri ali məktəblərə, 70 nəfəri orta ixtisas məktəblərinə qəbul olunmuş, imtahanlarda 5 nəfər 600-dən yuxarı bal toplamışdır. Maşxan kənd orta məktəbinin riyaziyyat müəllimi Müzəffər Hacıyev «Ən yaxşı müəllim» müsabiqəsinin qalibi olmuşdur.
2007/2008-ci tədris ilini müvəffəqiyyətlə başa vurmuş müəllimlərə və tələbə adını qazanmış gənclərin bir qrupuna fəxri fərmanlar və pul mükafatları təqdim edilmişdir.
Bölmənin digər xəbərləri
