ASTARADA GƏNC MUĞAM İFAÇILARI MÜSABİQƏSİNİN FİNAL MƏRHƏLƏSİ KEÇİRİLƏCƏK
Musiqi sənətinin milli növlərinin inkişafı, istedadlı gənclərin üzə çıxarılması və onlara böyük səhnədə çıxış etməyə imkan verilməsi məqsədi ilə Mədəniyyət Nazirliyi gənc muğam ifaçılarının müsabiqəsinin keçirilməsi haqqında qərar qəbul etmişdi. Müsabiqənin rayon və şəhər mədəniyyət idarələri tərəfindən avqustun ortalarında keçirilən birinci dövrəsində 9-15 yaşlı uşaqlar yarışmışlar. Final mərhələsinə 118 nəfər vəsiqə qazanmışdır.
Mədəniyyət Nazirliyindən bildirmişlər ki, final mərhələsini sentyabrın 20-22-də Astarada keçirmək nəzərdə tutulur. Münsiflər heyətinə Azərbaycanın xalq artistləri Səkinə İsmayılova və Ağaxan Abdullayev, əməkdar artist Gülyaz Məmmədova və başqaları daxildirlər.
Müsabiqənin mükafat fondu təxminən üç milyon manatdır. Qalib bir milyon manat, müsabiqənin birinci dərəcəli diplomunu və laureatı adını, ikinci, üçüncü və dördüncü yerləri tutanlar isə müvafiq surətdə 750 min, 500 min, 300 min manat, diplom və laureat adı alacaqlar. Təşkilat Komitəsi 250 min manat məbləğində iki həvəsləndirici mükafat da təsis etmişdir.
Bölmənin digər xəbərləri
