ATƏT iştirakçı dövlətlərinin Azərbaycandakı səfirləri cəbhə xəttindəki vəziyyət barədə məlumatlandırılıblar
Bakı, 4 aprel, AZƏRTAC
ATƏT iştirakçı dövlətlərinin Azərbaycandakı səfirləri işğal edilmiş Azərbaycan əraziləri ətrafında Ermənistan və Azərbaycan qoşunlarının təmas xətti boyunca aprelin 2-dən etibarən gərginləşən vəziyyət haqqında məlumatlandırılıblar.
Xarici işlər nazirinin müavini Araz Əzimov səfirlərlə görüşdə münaqişənin sülh yolu ilə həlli yolunda atəşkəsin böyük əhəmiyyət kəsb etdiyini vurğulayıb. O qeyd edib ki, Ermənistan davamlı olaraq atəşkəsi pozaraq diqqəti sülh prosesinin substantiv məsələlərindən yayındırmağa və beləliklə, status-kvonu uzatmağa çalışır. A.Əzimov Ermənistanın bu təxribatlarının adətən sülh prosesində müsbət dinamika yarandığı zamanlara təsadüf etməsinə diqqəti yönəldib.
Xarici İşlər Nazirliyinin mətbuat xidmətindən AZƏRTAC-a bildiriblər ki, nazir müavini atəşkəs və nəticəyönümlü sülh prosesinin dərhal bərpa olunmasının əhəmiyyətini vurğulayıb, bu müstəvidə Azərbaycan tərəfinin birtərəfli atəşkəs elan etdiyini xatırladıb. O, münaqişənin yalnız Azərbaycanın ərazi bütövlüyü və suverenliyi çərçivəsində həll edilə biləcəyini vurğulayıb.
Bölmənin digər xəbərləri
