Atletika idman növləri üzrə birincilik keçirilib
Naxçıvan, 28 aprel, AZƏRTAC
Naxçıvan Muxtar Respublika Stadionunda Naxçıvan Muxtar Respublikası Atletika Federasiyası və Naxçıvan Dövlət Tibb Kollecinin birgə təşkilatçılığı ilə “Zərərli vərdişlərə yox deyək!” devizi altında Naxçıvan Dövlət Tibb Kollecinin tələbələri arasında atletika idman növləri üzrə birincilik keçirilib.
AZƏRTAC-ın Naxçıvan bürosu xəbər verir ki, yarışın şərtlərinə görə hər komandada 5 oğlan, 5 qız, 1 hakim və 1 məşqçi olub və hər bir idmançı atletika idmanının 1 növü üzrə iştirak edib. Beləliklə, birincilikdə oğlan və qız komandaları atletikanın qaçış (100 metr, 200 metr, 400 metr), nizə və yadro itələmə növləri üzrə yarışıblar.
Beynəlxalq atletika qaydalarına uyğun olaraq keçirilən yarışda oğlan və qızlar arasında I yeri tutan idmançılar təşkilatçıların diplomları ilə mükafatlandırılıblar.
Qeyd edək ki, birinciliyin keçirilməsində məqsəd muxtar respublikada yeniyetmə və gəncləri atletika idman növünə cəlb etmək, atletika idman növünü inkişaf etdirmək və kütləviliyinə nail olmaq, həmçinin Naxçıvan Dövlət Tibb Kollecinin oğlan və qız tələbələrindən ibarət atletika idman növü üzrə yığma komandanın tərkibini müəyyənləşdirməkdən ibarət olub.
Bölmənin digər xəbərləri
