AVRASİYA ÖLKƏLƏRİ SƏKKİZİNCİ İQTİSADİ ZİRVƏSİNİN İŞTİRAKÇILARINA!
Hörmətli konfrans iştirakçıları!
Sizi - Səkkizinci İqtisadi Zirvə toplantısının bütün iştirakçılarını səmimi qəlbdən salamlayır və toplantının işinə uğurlar diləyirəm.
1998-ci ildən bəri hər il müntəzəm olaraq keçirilən Avrasiya iqtisadi zirvələri region dövlətləri və xalqları arasında iqtisadi, siyasi, mədəni əlaqələrin inkişafında mühüm hadisəyə çevrilmişdir. Zirvələrdə Avropa və Asiyanın əsas dövlətlərinin, nüfuzlu beynəlxalq təşkilatların nümayəndələrinin iştirakı ona marağın böyük olduğunu, müzakirə edilən məsələlərin və qəbul edilən qərarların əhəmiyyətini göstərir.
Azərbaycanın ümummilli lideri, mərhum Prezident Heydər Əliyev türkdilli dövlətlərin və digər Avrasiya ölkələrinin qarşılıqlı əlaqələrinin güclənməsinə və əməkdaşlığının inkişafına böyük önəm verir, bu istiqamətdə göstərilən bütün təşəbbüsləri dəstəkləyirdi. Onun əsasını qoyduğu bu siyasi xətti dönmədən davam etdirən hazırkı Azərbaycan rəhbərliyi ikitərəfli və çoxtərəfli regional əlaqələrin möhkəmləndirilməsi, əməkdaşlıq üçün yeni imkanların müəyyənləşdirilməsi, bölgədə sülhün və təhlükəsizliyin təmin olunması üçün zəruri tədbirlər görür.
Qloballaşma, demokratikləşmə və regional inteqrasiya proseslərinin geniş vüsət aldığı müasir dünyanın reallıqları bütün dövlətlərin və xalqların sıx siyasi, iqtisadi, humanitar və mədəni əlaqələr qurmasını, hamının və hər kəsin təhlükəsizliyinin birgə səylərlə təmin edilməsini, təcavüzkar separatizmə, terrora, müharibələrə qarşı birgə fəaliyyət göstərməyi tələb edir. Bu baxımdan toplantıdan region dövlətləri arasında iqtisadi, humanitar və siyasi əlaqələrin hazırkı vəziyyətinin ətraflı təhlil olunmasını və əməkdaşlığın gələcək üfüqlərinin müəyyənləşdirilməsi üçün sanballı təkliflər verilməsini gözləyirik.
Bu gün Azərbaycanla Türkiyə arasında əlaqələrin bütün sahələrdə uğurla inkişaf etdiyini, iqtisadi-ticarət əlaqələrinin möhkəmləndiyini, strateji müttəfiqlik münasibətlərinin mövcud olduğunu məmnunluqla qeyd edirəm. Türkiyənin Baş naziri cənab Rəcəb Tayyib Ərdoğanın Azərbaycana yenicə baş tutmuş rəsmi səfəri ikitərəfli və regional əməkdaşlıqla bağlı bir çox problemlərin həllinə güclü təkan vermişdir. Azərbaycanın dövlət rəhbərliyinin mövqeyi bundan ibarətdir ki, ölkələrimizin bütün maddi və mənəvi sərvətləri region və Avrasiya ölkələri xalqlarının rifahına və təhlükəsizliyinə xidmət etməlidir.
Azərbaycan Respublikası regional, beynəlxalq inteqrasiya və əməkdaşlıq proseslərinin fəal iştirakçısıdır. Ölkəmiz region və bütün dünya dövlətləri ilə qarşılıqlı surətdə faydalı iqtisadi və mədəni əlaqələr qurulmasında maraqlıdır. Azərbaycan bütün dünyada terrorizmə qarşı mübarizədə, regional təhlükəsizliklə bağlı tədbirlərdə, transmilli nəqliyyat-kommunikasiya layihələrinin həyata keçirilməsində birmənalı mövqeyi və fəaliyyəti ilə seçilir. Xüsusən beynəlxalq enerji layihələrində Azərbaycan həmişə əsas təşəbbüskarlardan və söz sahiblərindən biri olmuşdur. Bu gün biz Azərbaycanın mərhum Prezidenti Heydər Əliyevin memarı olduğu Bakı-Tbilisi-Ceyhan əsas ixrac boru kəmərinin reallaşmasının şahidiyik. Bir ay öncə Türkiyə, Gürcüstan, Qazaxıstan prezidentlərinin, ABŞ, Böyük Britaniya və başqa ölkələrdən olan yüksək vəzifəli şəxslərin iştirakı ilə kəmərin Azərbaycan ərazisindən keçən hissəsinə neft doldurulması mərasimini böyük təntənə ilə bayram etdik. İlin sonuna qədər Xəzər neftinin Ceyhan limanından dünyaya ixracı təntənəsini səbirsizliklə gözləyirik. 2006-cı ildə Bakı-Tbilisi-Ərzurum qaz kəmərinin inşası başa çatdırılacaqdır. Türkiyə, Gürcüstan və Azərbaycanın vahid dəmir yolu sistemi ilə birləşdirilməsi haqqında dövlətlərarası razılaşma əldə olunubdur. Artıq reallaşmasına heç kimin şübhə etmədiyi bu nəhəng layihələr dövlətlərimizi və xalqlarımızı siyasi, iqtisadi və mədəni cəhətdən daha da yaxınlaşdıracaq, Avrasiyanı qloballaşan dünyanın çiçəklənən, sülh, sabitlik və inkişafın hökm sürdüyü regionlarından birinə çevirəcəkdir.
Bir daha Zirvə toplantısının işinə müvəffəqiyyətlər arzu edərək, onun regionda və dünyada əməkdaşlıq və inteqrasiya proseslərinə əhəmiyyətli fayda verəcəyinə ümid edirəm.
İlham Əliyev
Azərbaycan Respublikasının Prezidenti
Bakı şəhəri, 1 iyul 2005-ci il.
Bölmənin digər xəbərləri
