AVROPA AZƏRBAYCANLILARI KONQRESİNİN TOPLANTISI KEÇİRİLMİŞDİR

10.06.2006 [14:08]
Çap et
A⁺ A^-

AZƏRTAC xəbər verir ki, iyunun 9-da Antalyada Dünya Azərbaycanlıları Ziyalılarının Forumu çərçivəsində Avropa Azərbaycanlıları Konqresinin (AAK) toplantısı keçirilmişdir. Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov tədbirdə çıxış edərək, AAK üzvlərini salamlamış, təşkilatın ötən müddət ərzində bir sıra uğurlar qazandığını vurğulamışdır. O, Dünya azərbaycanlılarının II qurultayından sonra Azərbaycan diasporunun tarixində yeni mərhələnin başlandığını söyləmiş, AAK-ın bu mərhələdə daha güclü təşkilata çevrilməsinin vacibliyini diqqətə çatdırmışdır.

AAK-ın prezidenti Bahəddin Kaya ötən dövrdə görülmüş işlər barədə ətraflı məlumat vermiş, təşkilatın strukturlarının təkmilləşdirilməsinə, onun daha çevik bir quruma çevrilməsinə ehtiyac olduğunu bildirmişdir.

Çıxışlarda qeyd edilmişdir ki, Azərbaycan həqiqətlərinin dünya ictimaiyyətinə çatdırılması, xalqımızın qədim və zəngin mədəniyyətinin təbliği sahəsində daha genişmiqyaslı tədbirlər həyata keçirilməlidir. Belə bir inam ifadə olunmuşdur ki, Avropada fəaliyyət göstərən Azərbaycan icmalarını öz ətrafında birləşdirən AAK bu çətin vəzifənin öhdəsindən gəlməyə qadirdir.

Almaniyadakı Maynts Azərbaycan Cəmiyyətinin sədri Başar Kömür, Niderland Azərbaycan Cəmiyyətinin sədri Sahil Qasımov, Estoniya parlamentinin üzvü Eldar Əfəndiyev, Ümumrusiya Azərbaycan Konqresinin icraçı direktoru Eldar Quliyev və başqaları çıxışlarında AAK-ın strukturlarının təkmilləşdirilməsi və təşkilatın fəaliyyətində ciddi dönüş yarada bilən islahatların aparılması ilə bağlı fikirləri dəstəklədiklərini bildirmişlər.

AAK-ın növbəti hesabat-seçki konfransının bu ilin oktyabrında keçirilməsi qərara alınmışdır.