Avropa Ədalətli Oyunlar Menecmentinin prezidenti: Azərbaycan həmişə idman dəyərlərinə xüsusi qayğı göstərir
Bakı, 24 noyabr, AZƏRTAC
“Dünən Bakıda keçirilən “Qala mükafatlandırma”sı mərasiminin təşkilatçılığı yüksək səviyyədə idi. Rəngarəng şoular, rəqslər və azərbaycanlı müğənnilərin gözəl ifalarından çox razı qaldım. Bütün bunlar göstərir ki, idman böyük bir ailədir”.
AZƏRTAC xəbər verir ki, bu sözləri Avropa Ədalətli Oyunlar Menecmentinin prezidenti Filip Huzyu Avropa Ədalətli Oyunlar Hərəkatının Konqresinin açılış mərasimində jurnalistlərə açıqlamasında deyib.
O, bildirib ki, Azərbaycan həmişə idman dəyərlərinə xüsusi qayğı göstərən ölkədir: “Milli Olimpiya Komitəsinin Ədalətli Oyunlar Komissiyanın sədri Xəzər İsayev də bu dəyərləri yüksək və ciddi şəkildə qiymətləndirir. Biz idman qurumu olaraq, bu sahədə baş verən bir sıra problemlərin həllini tapmaq istəyirik. Ona görə də bu gün Bakıdayıq”.
F. Huzyu dünən keçirilən mərasimdə Azərbaycan Badminton Federasiyasının da mükafatlandırılmasına toxunub: “Bu federasiya artıq ikinci dəfədir beynəlxalq feyr-pley mükafatına layiq görülür. Federasiyanın fəaliyyətində dinamik inkişaf hiss olunur, idman dəyərlərini necə üstün tutduqları görünür. Təbii ki, Azərbaycan Badminton Federasiyasının bu cür fəaliyyəti Avropada bir nümunədir və məhz onların beynəlxalq münsiflər heyəti tərəfindən yekdilliklə bu mükafata layiq görülməsi təəccüblü sayılmamalıdır. Mükafatın məhz Bakıda təqdim olunması isə həm bizim, həm də federasiya üçün ayrı bir həyəcandır".
Bölmənin digər xəbərləri
