Avropa Oyunlarının standartları Azərbaycanın dinamikliyini əks etdirir
Bakı, 9 iyun, AZƏRTAC
Üçüncü Avropa Oyunlarının başlamasına sayılı günlər qaldığı bir zamanda onun məşəlinin ilk alovlandırıldığı Azərbaycan dünyada xüsusi minnətdarlıq hissi ilə xatırlanır, müasir müstəqil dövlətimizin inkişafı diqqət mərkəzinə gətirilir, son illər ölkəmizin əldə etdiyi nailiyyətlərdən söhbət açılır. Çünki “Odlar Yurdu” Azərbaycan “qoca qitə”nin adı ilə bağlı ilk Oyunları dünyaya planetar bir yarış, bunadək keçirilmiş Olimpiya Oyunlarından heç də geri qalmayan böyük idman mübarizəsi kimi təqdim edib. Avropa Oyunlarının standartlarını müəyyən etmək üçün şərəfli bir missiyanı yerinə yetirən Azərbaycan qitə idmanına əvəzsiz töhfələr verdi. Avropa Oyunlarının Azərbaycanın qədim və müqəddəs “Atəşgah” məbədində alovlandırılan məşəlinin şöləsi “köhnə dünya” sakinlərini əbədi olaraq bayram, ruhlandırma və birlik mesajı ilə bir araya gətirdi, sağlam rəqabət uğrunda mübarizəyə çağırdı.
Bu sözləri Azərbaycan Alpaqut Federasiyasının prezidenti, idman eksperti Qüdrət Nuriyev AZƏRTAC-a açıqlamasında deyib.
Azərbaycanın miqyasına görə Yay Olimpiya Oyunlarından sonra ən böyük beynəlxalq idman tədbirini - I Avropa Oyunlarını yüksək səviyyədə təşkil etdiyini deyən mütəxəssis bildirib: “Bu, Avropa idmanı üçün ədaləti bərpa edən qərar olub: “Digər qitələrin öz Oyunları olsa da, Olimpiya hərəkatının vətəni olan Avropada belə bir yarış yox idi. Azərbaycanın Olimpiya hərəkatının vətəni Avropaya belə bir möhtəşəm idman hadisəsini bəxş etməsi ilə qürur duyuruq. Bu günlərdə Beynəlxalq Olimpiya Komitəsinin (BOK) prezidenti Tomas Bax Azərbaycanda səfərdə olarkən 2015-ci ildə Bakıda keçirilən birinci Avropa Oyunlarını məmnunluqla xatırladaraq qeyd edib ki, o, Prezident İlham Əliyev və Birinci xanım Mehriban Əliyevanın iştirak etdiyi Oyunların açılış mərasiminin hələ də xoş təəssüratları altındadır. Şübhəsiz, dünyanın sürətlə inkişaf edən ölkələrindən biri olan Azərbaycanda Avropa Oyunlarının standartlarının ən yüksək səviyyəyə qalxması təbii idi. Çünki Avropa Oyunları üçün müəyyənləşdirilən standartlar Azərbaycanın dinamikliyini əks etdirir”.
Qüdrət Nuriyev bu gün Azərbaycanda bütün sahələrin yüksək səviyyədə inkişaf etdiyini, prioritet istiqamətlərdən olan idmanın tərəqqisi üçün görülən işlərdən danışıb. Qeyd edib ki, sağlam həyat tərzinin təbliği Azərbaycan üçün mühüm əhəmiyyət daşıyır. İdmanla məşğul olmaq üçün hər cür şəraitin yaradılması təqdiredici haldır. Mükəmməl idman infrastrukturunun mövcudluğu ötən illərdə olduğu kimi, bu il də bir sıra mötəbər tədbirlər - o cümlədən Formula 1 kimi nüfuzlu yarışın, müxtəlif növlər üzrə dünya, Avropa çempionatlarının, dünya kuboku yarışlarının yüksək səviyyədə təşkilinə geniş imkanlar yaradıb. Hazırda Bakıda səfərdə olan Avropa Olimpiya Komitələrinin (AOK) prezidenti Spiros Kapralos bildirib ki, Avropa Oyunlarının tarixi məhz Bakıda başlayıb. Azərbaycan yarışın təşkili ilə bağlı elə irs qoyub ki, sonrakı Oyunlara ev sahibliyi edəcək ölkələr ən azı Bakıdakı standartlara cavab verməyə çalışırlar. AOK-un prezidentinin bu fikri bir daha təsdiqləyir ki, Azərbaycanın müəyyənləşdirdiyi yüksək standartlar bir ilk kimi Avropa, bütün dünya üçün nümunəyə çevrilib.
“Artıq iki ildən çoxdur ki, xalqımız qalib, müzəffər xalq kimi yaşayır. Tarixi Zəfərimizlə hər birimiz fəxr edir, qürur duyuruq. Bu gün yetişən gənc nəsil bütün sahələrdə böyük uğurlar qazanır. Azərbaycan Prezidenti İlham Əliyev çıxışlarının birində bu barədə deyib: “Biz gələcək nəsli də vətənpərvərlik ruhunda tərbiyə edəcəyik, necə ki, bunu həmişə etmişik və elə gözəl gənc nəsil yetişdirmişik ki, həm idman arenalarında ölkəmizin bayrağını qaldırır, həm də döyüş meydanında. İkinci Qarabağ müharibəsində iştirak edənlərin mütləq əksəriyyəti gənclər idi - bizim siyasətimiz əsasında yetişən, həm cəmiyyətdə, həm də ailələrdə gözəl tərbiyə alan gənclər idi”. Dövlətimizin başçısının dediyi kimi, bizim hər birimiz öz sahəmizdə, öz fəaliyyətimizdə bu müqəddəs Zəfərə layiq olmalıyıq”, - deyə idman eksperti qeyd edib.
Azərbaycanın özünü dünyada güclü idman dövləti kimi təsdiqləməsi, bütövlükdə ölkəmizin dünya arenasında mövqeyinin ildən-ilə möhkəmlənməsi ilə qürur duyduğunu bildirən Q.Nuriyev deyib: “Bütün bunlar ölkəmizdə sabitlik, əmin-amanlıq, təhlükəsizliyin hökm sürdüyü bir zamanda geniş quruculuq işlərinin aparılması nəticəsində mümkün olub. İdmançılarımız beynəlxalq arenalarda mübarizə meydanlarına qalib ölkənin qalib vətəndaşları kimi mübarizə aparırlar. Məhz bu inam və qətiyyət sayəsində sonadək mübarizə aparan əzmkar idmançılarımız Azərbaycanın şöhrətini yüksəklərə qaldırırlar.
Azərbaycan idmançıları növbəti sınaq qarşısındadırlar. Bir neçə gündən sonra komandamız tarixi Azərbaycandan başlayan növbəti Avropa Oyunlarında iştirak edəcək. Polşanın Krakov şəhərində keçiriləcək III Avropa Oyunlarında idmançılarımızdan yüksək nailiyyətlər gözləyirik. Çünki xalqımıza yalnız qələbələr yaraşır”.
Bölmənin digər xəbərləri
