AVROPA ŞURASI ÖLKƏLƏRİ PARLAMENT SƏDRLƏRİNİN TALLİNN SAMMİTİ BAŞA ÇATMIŞDIR
Milli Məclisin sədri Oqtay Əsədov çıxışında Avropa Şurasının yaranması, onun əhəmiyyəti və müasir mərhələdə böyük mahiyyəti barədə fikirlərini açıqlamış, bu gün demokratiyanın, demokratik idarəçılık sisteminin alternativi olmadığını qeyd etmişdir.
Keçid dövrünü yaşayan ölkələrdə demokratiyanın bərqərar və inkişaf etdirilməsində parlamentlərin müstəsna rol oynadığını bildirən Oqtay Əsədov, Azərbaycanda demokratik hüquqi dövlət quruculuğu prinsiplərinə böyük önəm verildiyini diqqətə çatdırmışdır. O, ölkəmizin qonşu dövlətlərdə də demokratiyanın inkişafında maraqlı olduğunu bildirmişdir.
Milli Məclisin sədri qeyd etmişdir ki, əgər bir ölkənin parlamenti qonşu ölkəyə qarşı ərazi iddiaları barədə qərar qəbul edirsə, o, demokratiyanı deyil, zorakılığı, güc tətbiqini və özbaşınalığı təşviq etmiş olur.
Azərbaycan parlamentinin rəhbəri bir sıra digər vacib məsələlərə də toxunmuş, demişdir ki, tarix boyu Qərblə Şərq arasında körpü rolunu oynamış Azərbaycan bu gün Avropa dəyərlərinin, demokratik ideyaların və baxışların yayılmasında da aparıcı yer tutur.
Elə həmin gün Milli Məclisin sədri Oqtay Əsədov Albaniya parlamentinin sədri Jozefina Topalli ilə görüşmüşdür. Görüşdə ölkələrimiz arasında əlaqələrin inkişaf perspektivləri müzakirə olunmuş, iqtisadi əməkdaşlığın genişləndirilməsinin, bu sahəyə xüsusi diqqət yetirilməsinin vacibliyi qeyd edilmiş, bu məsələlərdə parlamentlərin rolu xüsusi vurğulanmışdır.
Görüşdə Milli Məclisin deputatı Gültəkin Hacıyeva iştirak etmişdir.
Milli Məclisin sədri Oqtay Əsədov Gürcüstan parlamentinin rəhbəri Nino Burcanadze ilə də görüşmüşdür. Bu görüşdə qarşılıqlı maraq doğuran bir sıra vacib məsələlər ətrafında fikir mübadiləsi aparılmışdır. Ölkələrimiz arasındakı münasibətlərin çox yaxşı səviyyədə olduğu bildirilmiş, Azərbaycan neftinin Bakı-Tbilisi-Ceyhan kəməri ilə Ceyhan limanına çatması tarixi hadisə kimi qiymətləndirilmişdir. Səmərəli əməkdaşlığın təkcə ölkələrimiz üçün deyil, bütün region üçün mühüm rol oynadığı xüsusi qeyd edilmişdir.
Milli Məclis Aparatının rəhbəri Səfa Mirzəyev və deputat Əli Hüseynovun da iştirak etdikləri bu görüşdə qarşılıqlı maraq doğuran digər məsələlərə də toxunulmuşdur.
Oqtay Əsədovun Avropa Şurası Parlament Assambleyasının sədri Rene van der Lindenlə görüşündə ikitərəfli münasibətlərin daha da dərinləşdirilməsinin, əlaqələrin inkişaf etdirilməsinin vacibliyi vurğulanmışdır.
Milli Məclisin sədri Tallinn sammitində iştirak edən digər ölkələrin nümayəndə heyətlərinin rəhbərləri ilə də qısa görüşlər keçirmiş, səmərəli danışıqlar aparmışdır.
Sammit başa çatdıqdan sonra Estoniya Prezidenti Arnold Rüytelin adından iştirakçıların şərəfinə ziyafət verilmişdir. Estoniya dövlətinin başçısı bu cür beynəlxalq tədbirlərin ikitərəfli və çoxtərəfli əlaqələrin inkişafında rolunu yüksək qiymətləndirmişdir.
Milli Məclisin sədri Oqtay Əsədov Estoniya Prezidenti Arnold Rüytell ilə görüşərək Azərbaycan-Estoniya əlaqələrinin inkişaf etdirilməsi ilə bağlı bir sıra məsələləri müzakirə etmişdir. Ölkələrimiz arasında əlaqələrin genişləndirilməsi üçün böyük potensial imkanların olduğu bildirilmiş və bu imkanlardan istifadə edilməsinin zəruriliyi qeyd olunmuşdur.
Görüşdə Estoniyada Azərbaycan diasporunun fəaliyyəti, iqtisadi əməkdaşlığın perspektivləri, parlamentlərin qarşılıqlı münasibətləri və digər məsələlər diqqət mərkəzində olmuşdur.
Bölmənin digər xəbərləri
