AXALKALAKİDƏ VƏZİYYƏTƏ NƏZARƏT EDİLİR
Bölgə qubernatoru Qoqa Xaçidze demişdir: “Üç aydır ki, bəziləri vergi verməkdən imtina etdiklərinə görə, Axalkalakidə büdcə planı yerinə yetirilmir. Buna görə də, ticarət təşkilatlarında yoxlama aparılmışdır. Bu, yerli əhali tərəfindən narazılıqla qarşılanmışdır. Onların polislə toqquşmasında yalnız bir nəfər kiçik zədə almışdır. Mən hamı ilə görüşüb qanunu pozanların cəzalandırılacağına söz verdim. Hazırda vergi müfəttişliyinin əməkdaşları rayonda iş aparırlar”.
Lakin “Cavaxk” təşkilatı bunu “Cavaxk ictimai təşkilatlar şurası”nın Gürcüstan hökumətinə Samtsxe-Cavaxeti bölgəsinə muxtariyyət statusu verilməsinə dair müraciətindən sonra Gürcüstan hakimiyyətinin onlara təzyiq göstərmək cəhdi saymışdır. Bununla əlaqədar qubernator demişdir ki, onlar fitnəkarlıq üçün həmişə belə hadisələrdən istifadə etməyə çalışırlar və bu, qeyri-ciddi bəyanatdır.
Hadisəyə münasibət bildirən Prezident Mixail Saakaşvili demişdir: “Biz, adətən, lazım gələn hər yerdə qayda yaradırıq. Biz əvvəllər tam nəzarətsiz olan bu rayonlarda nəzarəti bərpa edirik. Əlaqədar orqanlarımız bu işə başlayan kimi, bəzi qüvvələr vəziyyəti gərginləşdirməyə çalışırlar. Lakin onlar istədiklərinə nail ola bilməyəcəklər. Artıq nə Gürcüstan o Gürcüstandır, nə də hüquq mühafizə orqanlarımız. İndi onlar yerli əhali ilə başqa cür işləyirlər”.
Bölmənin digər xəbərləri
