AZƏRBAYCAN 2004-CÜ İLDƏ XƏZƏR DƏNİZİNƏ 19,9 MİLYON KÖRPƏ NƏRƏ BALIĞI BURAXMIŞDIR
Ekologiya və Təbii Sərvətlər Nazirliyinin Su hövzələrində bioloji resursların artırılması və mühafizəsi departamentinin nəzdindəki 10 balıqyetişdirmə zavodu 2004-cü ildə Xəzər dənizinə, Kür çayına və ölkə daxilindəki sututarlarına müxtəlif cinsli 456, 3 milyon körpə balıq buraxmışdır.
Nazirlikdən AZƏRTAC-ın müxbirinə bildirmişlər ki onlardan 19,9 milyonu nərə cinsindən olan balıqlara, 48,7 mini qızıl balığa, 429,1 milyonu ayrı-ayrı balıq növlərinə aiddir. 7,3 milyon körpə ağ amuru, 6 milyon körpə nərəni isə Xıllı balıqyetişdirmə zavodu buraxmışdır.
2005-ci ildə balıqyetişdirmə zavodlarının dənizə 18 milyon körpə nərə balığı buraxması planlaşdırılır.
Nazirlikdən həmçinin bildirmişlər ki, kökü kəsilməkdə olan flora və fauna növlərinin beynəlxalq ticarətinə dair Konvensiya Katibliyi 2005-ci ildə qara kürü satışının ixrac kvotalarını təsdiq etmişdir. Azərbaycanın kvotası 6730 kiloqram olacaqdır ki, bunun da 3780 kiloqramı nərə balığı kürüsü, 2700 kiloqramı uzunburun balıq və 250 kiloqramı ağ balıq kürüsüdür.
Bundan başqa, nərə balığı tutulmasının ölkə kvotası da təsdiq edilmişdir. 2005-ci il ərzində Azərbaycan şirkətləri 100 ton nərə balığı tuta bilərlər.
Bölmənin digər xəbərləri
