Azərbaycan Ağır Atletika Federasiyası ciddi islahatlara start verib
Bakı, 10 may, AZƏRTAC
Moskvada Rusiya Ağır Atletika Federasiyasının (RAAF) təşkilatçılığı ilə beynəlxalq antidopinq seminarı keçirilib. Tədbirdə bir sıra mühüm məsələlər müzakirə edilib. Seminarda ölkəmizi Azərbaycan Ağır Atletika Federasiyasının (AAAF) baş katibi Rizvan Rəsulov təmsil edib.
AZƏRTAC xəbər verir ki, R.Rəsulov seminara 11 ölkənin milli federasiyalarının nümayəndələrinin qatıldığını diqqətə çatdıraraq deyib: “Seminar olduqca səmərəli keçdi. Əsas məqsəd ağır atletika idman növündə yaranan dopinq problemlərindən qaçmaq və gələcəkdə təmiz idman rəqabəti mühitinin yaradılması üçün səmərəli vasitə və metodların tətbiqi məsələlərinin müzakirəsi idi. Əsas məsələlərdən biri kimi ağır atletikada qeyri-dopinq hesab edilən yeni bitki preparatlarının tətbiqinin perspektiv və uğurları mövzusunda maraqlı mühazirələrin olması idi”.
Dopinqin idmanda ümumi problem olduğunu vurğulayan R.Rəsulov qeyd edib ki, xüsusilə müvəqqəti cəza almış ölkələr üçün bu, daha böyük əhəmiyyət daşıyır. Tətbiq olunan cəzanın aradan qaldırılması üçün müəyyən qərarlar qəbul edilir. Bu qərarların icrasını tam yerinə yetirən ölkələr də var, çətinlik çəkənlər, pozuntulara yol verənlər də. AAAF götürdüyü öhdəliklərə, qərarlarda göstərilən bütün bəndlərə tam riayət edir. Bunu seminarda da qeyd etdilər. Biz çalışırıq ki, ən yaxın zamanda yeniyetmələrimiz, sonra isə gənclərimiz və böyüklərimiz yarışlara qatılma hüququ əldə edə bilsinlər.
Baş katib vurğulayıb ki, işlərimiz müəyyən olunan plan üzrə davam etdirilməlidir. Biz götürdüyümüz öhdəliyi layiqincə yerinə yetirməyə çalışırıq. Bu məqsədə nə qədər nail olacağımızı zaman göstərəcək. Biz ilk olaraq kütləviliyə nail olunması istiqamətində addımlar atmışıq. Əsas da yeniyetmələrin yaxşı hazırlıq prosesi keçməsi, onların müəyyən səviyyəyə çatması üçün daha çox işlər aparılır. Çünki dopinqin qarşısının alınması, birdəfəlik yox edilməsi üçün kiçik yaşlardan aparılan işlər xüsusi əhəmiyyət daşıyır. İyunda verilən qadağanın səkkiz ayı başa çatır. Biz Milanda keçiriləcək 15 və 17 yaşlı oğlanlar və qızlar arasında Avropa birinciliyində iştirak etmək istəyirik. Çünki orada 17 yaşlı qızlar arasında yarış bizim üçün böyük əhəmiyyət daşıyır. Biz bu yarış vasitəsilə qızlar arasında Buenos-Ayres Yay Olimpiya Oyunlarına daha bir lisenziya əldə edə bilərik. Tokio Olimpiadası ilə bağlı isə durum fərqlidir. Çünki lisenziya əldə edilməsi sistemi dəyişib. Əvvəllər Olimpiadaya komanda hesabında toplanılan xallar vasitəsilə vəsiqə qazanılırdısa, indi bu hüququ fərdi qaydada əldə etmək lazımdır. Bunun üçün idmançılarımız şəxsi reytinqlərini yüksəltməli və 2018-2020-ci illərdə keçirilən lisenziya yarışlarında iştirak edərək mümkün qədər çox xal toplamalalıdırlar. Bu dövr üçün idmançının iştirak edəcəyi 6 yarışdan 4-də göstərdiyi ən yaxşı nəticə qeydə alınacaq. Bu ilin noyabrında Türkmənistanda dünya çempionatı keçiriləcək. İlk lisenziya xalları da elə bu yarışda qazanılmağa başlayacaq. Ona görə builki dünya çempionatı xüsusi əhəmiyyət kəsb edəcək. Beynəlxalq Olimpiya Komitəsinin qərarına görə, 2008-ci ildən indiyədək 20-dən çox dopinq hadisəsi qeydə alınan federasiyalar (buraya Azərbaycan da daxildir) Tokioda cəmi 2 ağır atletlə - bir kişi və bir qadın idmançı ilə təmsil oluna biləcəklər.
“Maddi-texniki bazanın gücləndirilməsi və idman növünün coğrafiyasının genişləndirilməsi istiqamətində Azərbaycan Ağır Atletika Federasiyası hazırda ciddi islahatlara start verib. İxtiyarımızda olan ağır atletika avadanlığının yerlərə paylanmasını təşkil edir, idman zallarını təmir edir, yeni ağır atletika zalları istifadəyə veririk. Hazırlıq istiqamətində isə keçən ilin dekabrından etibarən fasiləsiz təlim-məşq toplanışlarına start vermişik. Düzgün qidalanma, tibbi-bioloji təminat və əsasən də texniki, fiziki və psixoloji hazırlıqları qarşımıza əsas vəzifə qoymuşuq. Sıralarımıza əsasən yeniyetmə idmançıları dəvət etmişik. Milli yığma üçün ehtiyat qüvvələri hazırlamaq istiqamətində kompleks tədbirlər həyata keçiririk”, - deyə R.Rəsulov bildirib.
Bölmənin digər xəbərləri
