AZƏRBAYCAN AKROBATLARI BEYNƏLXALQ TURNİRDƏ 2 QIZIL, GÜMÜŞ VƏ BÜRÜNC MEDAL QAZANMIŞLAR
Azərbaycan akrobatları Rusiyada keçirilən beynəlxalq turnirdə 2 qızıl, gümüş və bürünc medal qazanmışlar.
Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, ustaların proqramında çıxış edənlər xüsusilə fərqlənmişlər. Ayla Əhmədova və Dilarə Sultanova cütlüyü 84.125 balla fəxri kürsünün ən yüksək pilləsinə qalxmışdır.
İranə Həşimi, Könül Fərəcova-Xoşnamaz və Nailə Tauçyolovadan ibarət üçlük bütün rəqiblərini geridə qoymuşdur. Hakimlər onlara 81.732 bal vermişlər.
Afaq Məhərrəmova və Pərizad Quliyevadan ibarət daha bir cütlük idman ustalığına namizədlərin proqramında yarışmışdır. Onlar rusiyalılardan sonra ikinci yeri tutmuşlar.
Faiq Sultanov və Tamara Babakişiyevadan ibarət qarışıq cütlük isə Rusiya akrobatlarından sonra üçüncü yeri tutmuşdur.
Hakimlər heyətində təmsil olunan Azərbaycan yığmasının məşqçisi İradə Qurbanova demişdir ki, idmançılarımız yaxşı çıxış etmişlər. Bu həm də onların bəzilərinin ilk yarışıdır. Növbəti beynəlxalq turnir isə noyabrın axırında Minskdə keçiriləcəkdir.
İdman gimnastları gələn ayın əvvəlində Moskvaya təlim-məşq toplanışlarına yola düşəcəklər. Azərbaycan yığmasının üzvləri Teymur Şahlamazov, Şakir Şirəliyev, Ruslan Balakişiyev və Elvin Ağadədəyev Rusiyanın gənclərdən ibarət komandası ilə birlikdə məşq edəcəklər.
Bölmənin digər xəbərləri
