Azərbaycan BRICS üçün arzuolunan dövlətlərdəndir ŞƏRH
Bakı, 26 oktyabr, AZƏRTAC
Azərbaycan dövləti heç zaman ölkənin taleyini bir quruma, təşkilata, bloka və ya alyansa bağlamayıb. Biz heç bir təşkilat qarşısında ona üzv olmaq və ya üzv olacağımız təqdirdə hansısa öhdəlikləri üzərimizə götürəcəyimizə vəd verməmişik. Eyni zamanda, verdiyimiz vədə görə hansısa siyasi və ya maliyyə dividendi əldə etməmişik. Bu baxımdan heç bir ölkə, beynəlxalq qurum hansısa öhdəliyimizi yerinə yetirmədiyimizə, amma buna görə siyasi və ya maliyyə dəstəyi almağımıza görə bizi ittiham edə, ölkəmizə qarşı tələblər irəli sürə bilməz. Azərbaycan bütün dövlətlərlə və qurumlarla münasibətləri qarşılıqlı fayda əsasında qurur, ölkənin suveren hüquqlarına xələl gətirə biləcək heç bir öhdəlik götürmür.
Bu fikirləri AZƏRTAC-a açıqlamasında hüquq müdafiəçisi Sahib Məmmədov söyləyib.
O bildirib ki, hazırda dünyada mövcud beynəlxalq təşkilatlarla yanaşı, olduqca böyük nüfuza malik hərəkatlar və platformalar var. Azərbaycan Qoşulmama Hərəkatında təmsil olunur və təşkilata sədrlik etdiyi 4 il ərzində ona yeni bir nəfəs verdi, bir qədər institutlaşdırdı. Bizim sədrliyimiz dövründə hərəkatın nüfuzu dəfələrlə artdı. Onlar Azərbaycanın üzvlüyündən və sədrliyindən bəhrələndikləri kimi, biz də bu hərəkatdan faydalandıq. Vətən müharibəsi dövründə BMT Təhlükəsizlik Şurasında əleyhimizə qətnamə qəbul etdirmək istəyənlərə imkan verməyən dövlətlərin bir çoxu məhz Qoşulmama Hərəkatında təmsil olunan dövlətlər oldu.
S.Məmmədov qeyd edib ki, BRICS adlanan və dünyanın super dövlətlərini özündə birləşdirən, amma hələ beynəlxalq təşkilata çevrilməyən platformada Azərbaycanın iştirakı məqbuldur və vacibdir. BRICS ən dinamik inkişaf edən böyük ölkələrin dövlətlərarası qeyri-rəsmi birliyidir. Başqa sözlə, bu, iqtisadiyyatları yüksək inkişaf potensialına malik olan dünya ölkələri arasında hərtərəfli qarşılıqlı əlaqənin gücləndirilməsi üçün platformadır.
“BRICS hələlik G7 kimi bir statusdadır və beynəlxalq təşkilat deyil, amma G7-dən fərqli olaraq ona klub da demək olmaz. G7 superdövlətlərin klubudur və əsas işləri başqalarına dərs keçmək və tələblər qoymaqdır. BRICS isə təşkilat olmasa belə, bəzi təşkilati elementlərə malikdir və gələcəkdə onun beynəlxalq təşkilata çevrilməsi istisna deyil. Onun vahid bankı təsis edilib, vahid valyutasının olması da istisna deyil. Azərbaycan üçün bu qurum həm də siyasi əhəmiyyət daşıyır. Azərbaycanın bu birlikdə təmsil olunmasının iqtisadi əhəmiyyəti də var. Bu qurumun, məsələn, Avropa Şurası, Avropa İttifaqı və sair qurumlardan fərqi odur ki, dövlət qarşısında heç bir hüquqi öhdəlik qoymur, ölkənin daxili işləri ilə bağlı tələblər irəli sürmür, kiminlə dostluq etmək, hansı blokda olmaq kimi tələbləri yoxdur. Əminliklə deyə bilərik ki, Azərbaycan BRICS üçün arzuolunan dövlətlərdəndir və həm bu platformaya töhfəsini verəcək, həm də milli maraqlarımız naminə ondan faydalanacaq”, - deyə Sahib Məmmədov bildirib.
Azərbaycanın COP29-u yüksək səviyyədə təşkil etməklə beynəlxalq arenada mövqelərini daha da möhkəmləndirəcəyini deyən hüquq müdafiəçisi əlavə edib: “Görünür, COP29 ərəfəsində Azərbaycana qarşı kampaniya keçirənləri də əsas narahat edən budur. Ölkəyə gələnlər Azərbaycanın onların təqdim etdiyi kimi deyil, müasir və sivil bir dövlət olacağının əyani şahidi olacaqlar”.
Bölmənin digər xəbərləri
