Azərbaycan çempionatında bir mövsümə 76 qol vuran bombardir Serbiyada klubunu dəyişib

Bakı, 30 yanvar, AZƏRTAC

Azərbaycanın U-17 millisinin və Serbiyanın "Srvena Zvezda" klubunun futbolçusu İslam Həsənov klubunu dəyişib.

AZƏRTAC xəbər verir ki, bu barədə serbiyalı futbol agenti Boyan İliç sosial şəbəkə hesabında paylaşım edib. Sözləşmənin detalları açıqlanmayıb.

B.İliçin sözlərinə görə, 1 ildən çoxdur Belqrad təmsilçisinin düşərgəsində olan 17 yaşlı hücumçu, nəhayət, Serbiyada oynamaq hüququ əldə edib.

"Srvena Zvezda" oyun praktikası qazanması üçün istedadlı futbolçunu yerli "Qrafiçar" komandasına icarəyə verib.

Qeyd edək ki, İslam Həsənov “Srvena Zvezda”ya “Sabah”dan keçib. O, 2023-cü ildə Bakı klubunun heyətində 76 qolla AFFA U-15 Liqasının bombardiri olub.

MÜƏLLİFLƏ ƏLAQƏ