AZƏRBAYCAN CÜDOÇUSU BEYNƏLXALQ TURNİRDƏ BÜRÜNC MEDAL QAZANMIŞDIR
“Neftçi” İdman Sağlamlıq Mərkəzindən AZƏRTAC-a bildirmişlər ki, mərkəzin 23 yaşa qədər gənclərdən ibarət 11 nəfərlik cüdo komandası Donetskdə Ukraynanın əməkdar məşqçisi Y. M. Zuserin şərəfinə keçirilmiş beynəlxalq turnirdə iştirak etmişdir.
Komandanın məşqçisi Rasim Məlikovun verdiyi məlumata görə, turnirdə Ukraynanın bütün bölgə və vilayətləri ilə yanaşı, Rusiya, Polşa, Rumıniya, Yunanıstan və digər ölkələrdən 500-ə yaxın cüdoçu mübarizə aparmışdır.
Turnirin mükafatını qazanmağa bir-neçə idmançımız yaxın olsa da, yalnız bir nəfər buna müvəffəq olmuşdur. Yeganə bürünc medalı Rüstəm Alimli (81 kq) qazanmışdır. Daha bir idmançımız Teymur Əhmədov (81 kq) isə 5-ci yerlə kifayətlənmişdir. 73 kiloqram çəki dərəcəsində mübarizə aparmış Azər Ağayev də uğur qazanmağa çox yaxın idi. Təsəlliverici görüşlərdə qələbələrini sıralamış cüdoçumuz 3-cü yer uğrunda görüşdə üstünlüyünü qoruya bilməmiş və 5-ci yeri tutmuşdur.
Komandamız turnirdən sonra Donetskdə 2 günlük təlim-məşq toplanışlarına qatılmışdır.
Bölmənin digər xəbərləri
