Azərbaycan Dillər Universitetində Çinin qış bayramı qeyd olunub
Bakı, 24 dekabr, AZƏRTAC
Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda Çinin “Dunçji” (“Qışın zirvəsi”) bayramına həsr olunan tədbir keçirilib.
ADU-dan AZƏRTAC-a bildirilib ki, açılış nitqi ilə çıxış edən Konfutsi İnstitutunun direktoru Rafiq Abbasov “Dunçji” bayramının Çin mədəniyyətində mühüm yer tutduğunu qeyd edərək, onun yaranma tarixi və əsas fəlsəfəsi haqqında ümumi məlumat verib.
Konfutsi İnstitutunun əməkdaşı Chen Chunyan bayram mərasimləri barədə məlumat verib, “Dunçji”nin rəmzi olan Meixua gavalı çiçəklərinin uzunömürlülüyü, qışı və gözəlliyi təcəssüm etdirdiyini bildirib. Daha sonra ADU-nun çinşünaslıq ixtisası üzrə təhsil alan tələbələri Çin xalq mahnılarını, “Mənim ədalətli şahzadəm”, “Kiçik xoşbəxtlik”, “Kiçik Qız” musiqi nömrələrini ifa ediblər.
Sonda tədris ili ərzində göstərdikləri fəaliyyətə görə Konfutsi İnstitutu və ADU-nun çinşünaslıq ixtisası üzrə təhsil alan fəal tələbələri mükafatlandırılıb.
Bölmənin digər xəbərləri
