Bakı, 9 dekabr, AZƏRTAC

İkinci Qarabağ müharibəsində əldə etdiyimiz Qələbədən sonra Azərbaycan dövləti Ermənistanla sülh danışıqlarının birbaşa tərəflər arasında aparılmasının ən uyğun variant olduğunu təklif edirdi. Otuz ilə yaxın müddətdə olduğu kimi, 2020-ci il 10 noyabr tarixli üçtərəfli Bəyanatın imzalanmasından indiyədək vasitəçi kimi proseslərə daxil olmuş ölkələrin məkrli və ikiüzlü siyasəti nəticəsində sülh danışıqlarında mühüm irəliləyiş olmadı. Bu baxımdan da, birbaşa danışıqların aparılmasının məqsədəmüvafiq olduğunu səsləndirən Prezident İlham Əliyev bir daha haqlı olduğunu, uzaqgörənliyini sübut etdi.

Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.

Politoloq bildirib ki, Azərbaycan və Ermənistan Baş nazirlərinin müavinləri arasında ikitərəfli görüşün keçirilməsi və Azərbaycan Respublikası Prezidentinin Administrasiyası ilə Ermənistan Baş nazirinin Aparatı arasında humanizm dəyərlərini rəhbər tutaraq saxlanılan hərbiçilərin azad edilməsi və xoş niyyət olaraq digər siyasi razılaşmaların əldə olunması birbaşa dialoqun nəticəsidir. Əlbəttə, münasibətlərdə dönüşün yaranması üçün Azərbaycanın sülhə məcburetmə tədbirlərinin və mövcud reallığı qəbul etməyərək pozuculuq fəaliyyəti göstərilən ölkələrə verilən cavabların da böyük əhəmiyyəti oldu. Ermənistan və beynəlxalq hüququ yox, öz maraqlarını güdən ölkələr anladılar ki, Azərbaycanla güc, zor yolu ilə danışmaq olmaz. Bizimlə ancaq əməkdaşlıq etmək olar.

Azərbaycan və Ermənistan hökumətləri arasında razılaşdırılan məsələləri tarixi hadisə adlandıran Yalçın Hacızadə əlavə edib: “Bu, tərəflərin vasitəçilərsiz bir-birinə etimadının yarandığını göstərir. Hesab edirəm ki, Ermənistan regionu maraqlı ölkələrin münaqişə ocağına çevirməyin nə qədər təhlükəli olduğunu və bunun nəticələrinin onun üçün ağır ola biləcəyini görməyə başlayıb. Ədalətin təmin olunması üçün torpaqlarımızın işğaldan azad olunması ilə yanaşı, separatizmi dəstəkləyənlərin, rəhbərlik edənlərin də hüquqi məsuliyyətə cəlb edilməsi lazım idi ki, dövlətimiz bu istiqamətdə böyük tədbirlər gördü. Yayımlanan birgə bəyanatda ancaq hərbçilərin azad edilməsinin nəzərdə tutulması, separatçıların layiqli cəzalarını alacaqlarını, onlara qarşı humanist davranılmayacağını bildirir. Hər iki ölkə hökumətlərinin birgə xoşməramlı bəyanat verməsi regionda sülhün əldə olunmasının vaxtının çatdığını və bunun üçün mühüm şəraitin formalaşdığını göstərir. Görünən odur ki, yaxın zamanlarda sülhün əldə olunması üçün daha böyük addımlar atılacaq ki, bu da regionumuza böyük faydalar verəcək”.

Politoloqun fikrincə, Zəngəzur dəhlizi və Qərbi azərbaycanlıların öz dədə-baba yurdlarına köçürülməsi məsələsi də gözlənilən razılaşmaya daxil ediləcək. Bir neçə gün bundan əvvəl ADA Universitetində keçirilən “Qarabağ: 30 ildən sonra evə dönüş. Nailiyyətlər və çətinliklər” beynəlxalq Forumunda Prezident İlham Əliyev öz fikrini açıqlayaraq bildirdi: “Bizim onların suverenliyi ilə bağlı hər hansı şərtlərimiz yoxdur, lakin Azərbaycanın əsas ərazisindən Naxçıvana asan çıxış olmalıdır. Baş nazir Paşinyana artıq söylədiyim kimi, bu, Azərbaycandan Azərbaycana gediş olacaq və ona görə hər hansı gömrük rüsumları, yoxlamalar, sərhəd yoxlanışı olmalı deyil, çünki gediş əsas ərazidən Naxçıvana həyata keçirilir. Əgər bunlar Xəzər dənizinin şərq sahilindən Ermənistana və digər yerlərə gedirsə, siz onda, əlbəttə, bütün gömrük rüsumlarını digər ölkələr etdiyi kimi tətbiq edə bilərsiniz. Lakin Azərbaycandan Azərbaycana yoxlamalar, müdaxilə olmalı deyil və bu, bizim legitim hüququmuzdur”. Dövlətimizin başçısının Forumda söylədiyi fikirlər, tezislər Azərbaycan-Ermənistan sülh müqaviləsinin, o cümlədən hər iki ölkənin gələcək münasibətlərinin əsasını təşkil edəcək.