Bakı, 31 oktyabr (AZƏRTAC). Bakıda keçirilən III Beynəlxalq Forum mükəmməl səviyyədə təşkil olunmuşdur. Mükəmməldir ona görə ki, Forum Azərbaycanın əldə etdiyi nailiyyətləri ümumiləşdirilmiş şəkildə əks etdirir.

Bu sözləri AZƏRTAC-a müsahibəsində III Bakı Beynəlxalq Humanitar Forumda iştirak edən, Azərbaycan əsilli fransız aktyoru Rober Osseyn demişdir.

Aktyor valideynlərinin Azərbaycan torpağından olmalarını və özünün bu ölkəyə aidliyindən qürur duyduğunu bildirmişdir. “Burada gördüklərim məndə böyük təəssüratlar yaratdı. Çünki burada bütün dinlərin və xalqların nümayəndələri bir ailə kimi yaşayırlar. Bu, məndə böyük fərəh hissi oyadır. Hesab edirəm ki, dinlər və xalqlar arasında Azərbaycanda olan münasibətlər dünyanın heç bir yerində yoxdur. Fəxr edirəm ki, mən də bu xalqın bir parçasıyam”, - deyə o bildirmişdir. Azərbaycanda mövcud olan yüksək tolerantlıq, humanizm səviyyəsindən fərəhləndiyini bildirən Rober Osseyn qeyd etmişdir ki, əgər bütün dünyada belə şərait olsa insanlar çox xoşbəxt olardılar.

Aktyor Azərbaycanda insani münasibətləri, qadınlara olan hörməti bütün dünyaya göstərmək üçün tamaşa hazırlamağı düşünür. Dünyanın heç bir yerində qadına belə münasibətin şahidi olmadığını deyən aktyor tamaşanın çariça Tomris timsalında Azərbaycan qadınına həsr olunacağını diqqətə çatdıraraq demişdir: “Tamaşa lap qədimdən müasir dövrümüzə qədər Azərbaycan cəmiyyətində qadının rolundan bəhs edəcəkdir. Səhnə əsərinin hazırlanmasında Azərbaycan dövləti və Heydər Əliyev Fondunun dəstəyinə də ümid edirəm. Azərbaycanda qadına olan ehtiramı dünya ictimaiyyətinə çatdırmağı özümə borc bilirəm. Əgər bu fikri reallaşdıra bilsəm, bu, mənim incəsənətlə bağlı sonuncu işim olacaqdır. Əsas amalım odur ki, bu tamaşanı Parisdə nümayiş etdirim”.

Rober Osseyn Heydər Əliyev Fondunun fəaliyyətini yüksək qiymətləndirmişdir. O qeyd etmişdir ki, Fondun prezidenti Mehriban Əliyeva Azərbaycan mədəniyyətini dünyaya tanıtmaq üçün böyük işlər görür. Mən Azərbaycana birinci dəfədir gəlirəm. Bu sevinci mənə bəxş etdiyi üçün Mehriban xanıma təşəkkür edirəm. Bu mənim üçün böyük hədiyyə oldu.