AZƏRBAYCAN GƏNCLƏRİ GÜNÜNƏ HƏSR EDİLMİŞ SƏRGİ-MÜSABİQƏ KEÇİRİLMİŞDİR
AZƏRTAC xəbər verir ki, Gənclər, İdman və Turizm və Mədəniyyət nazirliklərinin, Səttar Bəhlulzadə adına mərkəzi sərgi salonunun birgə təşkilatçılığı ilə fevralın 2-də Azərbaycan Gəncləri Gününə həsr edilmiş sərgi-müsabiqə keçirilmişdir.
Sərgidə tamaşaçılara 50 gənc rəssamın təsviri sənətin müxtəlif janrlarında 120-yə yaxın əl işi təqdim olunub.
Mədəniyyət nazirinin müavini Ədalət Vəliyev tədbiri açaraq, iştirakçıları əlamətdar gün münasibətilə təbrik etdi. O bildirdi ki, ulu öndərimiz Heydər Əliyevin yadigarı olan Gənclər Günü münasibətilə hər il bu sərgi salonunda müsabiqə keçirilir və qaliblər mükafatlandırılır.
Gənclər, idman və turizm naziri Əbülfəz Qarayev incəsənət və mədəniyyət xadimlərinin hazırkı tədbirdə geniş tərkibdə iştirakını ölkəmizdə Azərbaycan Gəncləri Gününün geniş surətdə qeyd olunmasına əyani sübutu kumu xüsusi vurğulayaraq dedi ki, son illər respublikamızda idman kütləvi xarakter almışdır. İndi idmançılarımızın qalibiyyət soraqları dünyanın müxtəlif ölkələrindən gəlir. Yaxşı haldır ki, gənc sənətçilərimiz də inkişaf edir, peşəkarlıq səviyyələrini getdikcə yüksəldirlər. Gənclərin indiki sərgi-müsabiqəsi də bunu aydın göstərir. Nazir sərgi iştirakçılarını təbrik etdi, onlara yeni yaradıcılıq uğurları arzuladı.
Tədbirdə 4 nominasiya - ən yaxşı qrafika, ən yaxşı boyakarlıq, ən yaxşı heykəltəraşlıq və ən yaxşı tətbiqi sənət əsərlərinin qaliblərinə Gənclər, İdman və Turizm və Mədəniyyət nazirliklərinin diplom və mükafatları, Mərkəzi Sərgi Salonunun həvəsləndirici mükafatları təqdim olundu.
Bölmənin digər xəbərləri
