Azərbaycan gənclərinin təklifləri BMT-nin sənədində əksini tapacaq
Bakı, 16 sentyabr, AZƏRTAC
Azərbaycan Gənclər Fondu və BMT-nin Azərbaycandakı nümayəndəliyi “BMT-75” təşəbbüsü çərçivəsində təhsil mövzusuna həsr olunmuş dialoq təşkil edib.
Fonddan AZƏRTAC-a bildiriblər ki, onlayn tədbirdə iştirak edən 40-dan çox fəal gənc, o cümlədən fiziki məhdudiyyətli şəxslər pandemiya dövründə təhsil sahəsində üzləşdikləri çətinliklər və onların həlli yolları haqqında müzakirə aparıblar.
İştirakçılar təhsilin hər bir gənc üçün əlçatımlılığı, bu sahədə texnoloji baza və təchizatın təkmilləşdirilməsi, hər kəs üçün bərabər imkanların yaradılması, habelə fiziki məhdudiyyətli gənclər üçün məşğulluq imkanlarının artırılmasının vacibliyini vurğulayıb, yerli və qlobal səviyyədə görülməli işlərə dair təkliflərini veriblər.
Qeyd olunub ki, bu dialoqlar zamanı səslənən fikir və təkliflər “BMT-75” prosesinin hədəflərindən biri olan “Baxış-2045” (Vision 2045) qlobal sənədinin hazırlanmasına töhfə verəcək.
Hər kəs görüşlərlə yanaşı, “BMT-75” çərçivəsində başlanmış qlobal sorğuda da iştirak edərək gələcəyə dair rəy və təkliflərini bildirə bilər: https://un75.online/?lang=aze.
Bölmənin digər xəbərləri
