Azərbaycan IMO-nun 20-dən çox konvensiya və protokolunu ratifikasiya edib
Bakı, 21 iyul, AZƏRTAC
Azərbaycan Respublikası 1995-ci ildən Beynəlxalq Dəniz Təşkilatının (IMO) üzvüdür. Bu müddət ərzində ölkəmiz IMO-nun 20-dən çox konvensiya və protokolunu ratifikasiya edib.
AZƏRTAC xəbər verir ki, bu sözləri Bakıda keçirilən “Təhlükəsiz keçid 2026” Forumunda Azərbaycan Dövlət Dəniz və Liman Agentliyinin nümayəndəsi Səbuhi Orucov deyib.
O vurğulayıb ki, sözügedən beynəlxalq sənədlər arasında qlobal dənizçilik tənzimləmə çərçivəsinin üç əsas sənədi xüsusilə qeyd olunmalıdır. “Ölkəmiz Dənizdə insan həyatının mühafizəsinə dair Beynəlxalq Konvensiya (SOLAS), Gəmilərdən çirklənmənin qarşısının alınmasına dair Beynəlxalq Konvensiya (MARPOL), həmçinin Dənizçilərin hazırlanması, diplomlaşdırılması və növbə çəkməsinə dair Beynəlxalq Konvensiyasına (STCW) üzvdür. Eyni zamanda Azərbaycan IMO üzv Dövlətlərinin Audit Sxemindən (IMSAS) uğurla keçərək beynəlxalq dənizçilik sənədlərinin effektiv şəkildə icrasına sadiqliyini nümayiş etdirib. STCW Konvensiyasının tam və effektiv şəkildə icrasının göstəricisi olaraq Azərbaycan IMO-nun “Ağ siyahı”sında (White List) yer alır. Bu, ölkəmizin dənizçilərin hazırlanması və sertifikatlaşdırılması sahəsində beynəlxalq səviyyədə tanınmış standartlara əməl etdiyini göstərir”, - deyə agentliyin nümayəndəsi bildirib.
Bölmənin digər xəbərləri
