AZƏRBAYCAN KƏND TƏSƏRRÜFATI SAHƏSİNDƏ YENİLİKLƏRƏ AÇIQ ÖLKƏDİR
Bakı, 9 iyun (AZƏRTAC). Ölkəmizdə səfərdə olan ABŞ-ın Taskici Universitetinin Biotexnoloji Tədqiqatlar Mərkəzinin direktoru, professor Çanapatna Prakaş iyunun 9-da Amerika Mərkəzində mətbuat konfransı keçirmişdir. Genetik baxımdan modifikasiya olunmuş məhsullar haqqında məlumat verən C.Prakaş bildirmişdir ki, bu üsulla texnologiya təxminən 20 il bundan əvvəl yaradılıb, 13 il bundan əvvəl isə bu məhsulları ABŞ, Kanada və Argentina kimi ölkələr yetişdirməyə başlamışlar. C.Prakaş qeyd etmişdir ki, təxminən 25-dən çox ölkə bu sahədə geniş təcrübəyə malikdir və 125 milyon hektardan çox ərazi genetik baxımdan modifikasiya olunmuş məhsullar üçün istifadə olunur.
Azərbaycanın olduqca zəngin təbiətə malik olduğunu vurğulayan C.Prakaş ölkənin son bir neçə ildə həm məhsulların emalı sahəsində müasir texnologiyalar və yeni üsullardan istifadə etdiyini, kənd təsərrüfatının inkişafı üçün müasir avadanlıqların alındığını, suvarma sisteminin təkmilləşdirilməsi sahəsində bir çox addımların atdığını bildirmişdir. O, həmçinin əlavə etmişdir ki, Azərbaycan kənd təsərrüfatı sahəsində yeniliklərə açıq ölkədir.
Qonaq iyunun 10-dan Azərbaycanın regionlarına səfər edəcəyini və fermerlərlə görüşlər keçirəcəyini bildirmişdir.
Bölmənin digər xəbərləri
