Azərbaycan Milli Kitabxanasında “Xocalı soyqırımı: insanlığa qarşı cinayət” mövzusunda kitab sərgisi açılışmışdır
Bakı, 21 fevral (AZƏRTAC). Fevralın 21-də M.F.Axundzadə adına Azərbaycan Milli Kitabxanasında Xocalı faciəsinin 22-ci ildönümü ilə əlaqədar “Xocalı soyqırımı: insanlığa qarşı cinayət” mövzusunda kitab sərgisi açılmışdır.
AZƏRTAC xəbər verir ki, əvvəlcə tədbir iştirakçıları Xocalı soyqırımı qurbanlarının xatirəsini bir dəqiqəlik sükutla yad etmişlər.
Sərginin açılış mərasimində çıxış edən Milli Kitabxananın direktoru Kərim Tahirov Xocalı soyqırımının bəşəriyyətə yönələn cinayət olduğunu qeyd etmiş və faciə haqqında məlumat vermişdir.
Mədəniyyət və Turizm Nazirliyinin şöbə müdiri Vaqif Quliyev bildirmişdir ki, 1992-ci il fevralın 25-dən 26-na keçən gecə Ermənistan hərbi birləşmələri keçmiş sovet ordusunun Xankəndidə dislokasiya olunmuş 366-cı motoatıcı alayının canlı qüvvələri və hərbi texnikası ilə birlikdə Azərbaycanın Xocalı şəhərində misli görünməmiş soyqırımı aktı həyata keçirmişlər. Soyqırımı zamanı yüzlərlə insan vəhşicəsinə qətlə yetirilmiş, yaralanmış, girov götürülmüş, itkin düşmüşdür.
Sonda tədbir iştirakçıları Milli Kitabxananın əməkdaşları tərəfindən hazırlanmış “Xocalı soyqırımı” adlı elektron məlumat bazası və sərgi ilə tanış olmuşlar.
Bölmənin digər xəbərləri
