Azərbaycan millisinin baş məşqçisi: Elə komanda qurmaq istəyirəm ki, hər kəs fəxr etsin
Qəbələ, 25 aprel, AZƏRTAC
Hazırlıq dövründə oyunçulardan istədiyimizi alırıq.
AZƏRTAC xəbər verir ki, bu sözləri Qəbələdə təlim-məşq toplanışında olan 20 yaşadək futbolçulardan ibarət Azərbaycan millisinin baş məşqçisi Rui Jorje jurnalistlərə açıqlamasında deyib.
O, 2 həftəlik toplanışdan razı qaldığını bildirib: "Birinci toplanışda yoxlama oyunları keçirməməyimizə səbəb budur ki, futbolçuları yaxından tanıyaq. Onlar məşq prinsiplərimizi yaxşı mənimsəsinlər. Bu toplanışda bizim hansı səviyyədə olduğumuzu öyrənmək daha önəmli idi. Futbolçuların istəkli olmaları bizim fəlsəfəmizə uyğun gəlir. Hansı taktika ilə mübarizə aparacağımızı indidən demək olmaz. Amma hər kəs hücum futboluna daha çox üstünlük verir. Bu istiqamətdə getmək istəyirik. Bunun üçün çox məşq etməliyik".
Baş məşqçi heyət seçimini necə etdiyini də açıqlayıb: "Bundan əvvəlki yaş kateqoriyalarının oyunlarına baxıb, ona uyğun seçim etmişik. Məndən əvvəl işləyən mütəxəssislər haqqında danışmaq düzgün olmaz. Elə komanda qurmaq istəyirəm ki, hər kəs fəxr etsin".
Portuqaliyalı mütəxəssis ikinci toplanışda xarici komandalarla yoxlama matçları keçirəcəklərini qeyd edib.
Müxbir - Cavid Əliyev
Bölmənin digər xəbərləri
