Azərbaycan millisinin baş məşqçisi: Qalib olmaq üçün əlimizdən gələni edəcəyik
Bakı, 3 noyabr, AZƏRTAC
“Güclü komandaya qarşı oynayırdıq və fikrimcə baxımlı oyun alındı”.
Bu sözləri AZƏRTAC-a açıqlamasında minifutbol üzrə Azərbaycan millisinin baş məşqçisi Elşad Quliyev Birləşmiş Ərəb Əmirliklərində
təşkil olunan dünya çempionatında Bolqarıstan seçməsinə 3:1 hesabı ilə qalib gəldikləri oyun barədə danışarkən deyib. Mütəxəssis matçın
ağır keçdiyini və nəticədə komandanın çox güc itirdiyini bildirib: “Lakin biz yarımfinal görüşündən əvvəl bunu bərpa etməyə çalışırıq”. Mundialın yarımfinal mərhələsində Qazaxıstan yığmasına qarşı oynayacaqlarını xatırladan Elşad Quliyev rəqibin çox güclü komanda olduğunu vurğulayıb: “Qazaxıstan yığması dinamik və texnikalı komandadır. Oyunun yaxşı alınmasından çox şey asılıdır. Bu oyunda istəyimizə çata bilsək kubok haqda fikirləşərik. Oyunçulardan xırda zədələri olan var. Buna baxmayaraq finala çıxmaq üçün əlimizdən gələni edəcəyik. Ölkəmizə final sevinci yaşatmaq istəyirik”.
Qeyd edək ki, bu gün keçiriləcək Azərbaycan-Qazaxıstan görüşü Bakı vaxtı ilə saat 20:30-da başlayacaq.
Bölmənin digər xəbərləri
